E problema di obesidad ta sigui scala birando un sobrepeso mas pisa pa e presupuesto nacional di salud.

Ruud Barlage, kende ta zorgmanager di Obesitas den Wit Gele Kruis (WGK), a indica cu e problema aki ta aumenta no solo na Aruba, sino den nos region Caribe y henter mundo. Un cifra cu ta papia pa su mes -y cu Barlage a trece dilanti- ta indica cu na aña 1975, obesidad na mundo den hende homber mayor di 19 aña tabata alrededor di 31 miyon, y na aña 2016 a wordo registra 281 miyon. Mientras na 1975 entre hende muhe mayor di 19 aña tabatin 78 miyon di nan cu problema di obesidad, y na aña 2016 el a bira 390 miyon.

Obesidad na Aruba
Na Aruba 35% pa 50% di nos yiu tin sobrepeso. Nan ta muchanan di 10 aña te hobencitonan di 18 aña. E cifra alarmante di obesidad ta subi alrededor di 15% pa aña. Entre 81% pa 85% di nos comunidad tin sobrepeso of obesidad. Nos isla ta entre e top cinco di paisnan di mundo cu e tipo di problema aki, cu tin su impacto riba salud publico.

Segun Barlage, si nos no ta haci nada e problema ta bira mas grandi. Pais Aruba ta inverti 500 miyon florin di su presupuesto anualmente den salud. E ta alrededor di 10% di nos GDP. Esaki ta exigi di nos tur un conscientisacion riba kico nos ta come, bebe y haci pa bienestar di nos salud.

A implementa plan na nivel nacional y ainda e problema di obesidad ta sigui crece. Barlage a declara na Bon Dia Aruba cu e problema tin di haber cu parti di nos cultura. Tin hopi cuminda accesibel mas facil pa nos hendenan. Otro factor tin di haber cu e hendenan no tin tempo pa cushina saludabel. Mientras cu e opcion mas facil, pero no mas barata, ta bira ‘fast food’.

Generacion futuro
Un punto cu el a trece dilanti tin di haber cu e generacion futuro. Mester pone mas atencion riba nan, ya cu muchanan di 10 pa 18 aña, alrededor di 50% di nan tin problema di sobrepeso. E pregunta ta: Kico lo para cu nos futuro generacion? Ya cu nan ta e potencial candidatonan pa hereda e problema di sucu cu tur nan complicacionnan, malesanan y gastonan financiero.

Mirando e cifranan aki, e momento ta uno crucial pa tur instancia envolvi percura pa bin cu un cambio – segun Barlage- ya cu si e situacion actual no ta cambia, e ta sali for di control. Si 500 miyon florin ta wordo inverti pa salud so pa un isla di 120 mil hende, e ta ‘hopi placa.’ Hulanda ta uza 13.3% di su GDP solamente pa salud, mientras Aruba ta uza 10%.

Consumo di fast food
Un factor cu mester tene cuenta tin di haber cu e consumo di fast food y nos forma di alimentacion no balansa. “Nos ta come hopi malo. Nos tin dos enemigo, number un ta sucu….” Organisacion Mundial di Salud ta recomenda pa uza no mas cu 30 gram sucu pa dia, si ta menos, ta miho. Pero tin hende na Aruba cu no ta bebe ni sikiera un glas di awa pa dia, sino refresco.

Na Aruba nos ta uza 80 pa 120 gram di sucu pa dia, specialmente pa e consumo di refresco; y consumo di fast food. Un combo normal di hamburger, batata y refresco ta alrededor di 800 caloria. Normal bo mester consumi 1800 pa 2 mil caloria diariamente, kiermen si bo ta come fast food dos pa tres biaha pa siman, bo ta haya un dia extra di caloria. Preocupante ta cu Barlage a yega di atende hopi pashent cu ta come dos pa tres biaha pa dia fast food.

“P’esey nan ta haya problema. Si bo ta bira mas gordo, bo ta haya mas problema cu bo salud,” el a bisa.

Persona cu tin un gordura extremo of obesidad morbida tin 50% di chens pa sufri problema di sucu. Mientras Barlage a trece e cifra cu 90% di pashentnan local cu ta sufri di diabetes tin sobrepeso. Tambe nan tin mas chens pa haya malesa di Alzheimer, problema di curason y presion halto, etc., ya cu un persona obeso generalmente no ta cana y no ta come saludabel.

Barlage ta haya cu esaki ta e causa principal di obesidad na Aruba. Hende no ta comiendo saludabel y si nan ta come malo, nan ta bira mas gordo. Y si bo ta bira mas gordo, bo ta haya un serie di problema di salud. Ademas un persona cu problema di obesidad ta perde 7 aña di bida.