Te ainda ministerio di Husticia no por a ehecuta cabalmente su proyecto di retorno boluntario di ciudadanonan cu a keda ilegal na Aruba. Mayoria di nan ta ciudadanonan Venezolano cu nan kier bolbe na nan pais, despues cu crisis di coronavirus a dal nos isla duro.
Minister di Husticia, Andin Bikker a laga sa cu e proceso diplomatico cu e pais bisiña di Venezuela a bira hopi complica. Esaki ta pone e situacion regional den su totalidad hopi dificil. Siman pasa di banda di Venezuela nos gobierno a tuma nota cu e nan gobierno a emiti un comunicado cu nan ta cera na frontera hermeticamente.
Tur e situacion aki ta pone cu e negociacion diplomatico ta bira dificil. Cada bes cu nan tin un fecha pa repatria e personanan, esaki ta cay, segun e mandatario.
Bikker a bisa cu nan tabatin vuelo reserva caba dia 8 y 11 di mei ultimo. Nan tabata 10 vuelo den total. Pero na ultimo momento, dia 7 di mei ya scurito, nan ta bin tende cu e vuelonan aki no por lanta bay. Cierto obstaculo di parti di Venezuela a presenta cu a imposibilita e vuelonan aki.
Pa realisa e tipo di vuelo aki, logicamente nan mester di autorisacion y permiso di Venezuela. pero te ainda Aruba no a haya un fecha fiho pa ehecuta e vuelonan di repatriacion aki. Nan ta sigui haci nan maximo esfuerso diplomaticamente. El a reitera cu nan kier pa e personanan cu a registra den e programa boluntario aki por bay bek na nan pais.
Guarda Nos Costa.
E situacion a bira mas complica, ya cu actualmente no tin un vuelo regular pa deporta nan. Mientras cu Guarda Nos Costa nan capacidad di detencion den nan instalacion a yega un tope.
“Na Guarda Nos Costa nos ta enfrentando hopi reto”, el a bisa. E hendenan cera na Guarda Nos Costa no ta personanan cu a registra pa bay boluntariamente. Nan ta personanan cu a keda deteni y cu nan papelnan no tabata na ordo. Nan ta personanan cu nan tin pa expulsa. Algun di nan ta persona cu a sali for di KIA, y nan ta bira un menasa pa nos ordo publico. P’esey nan mester tene nan como recluso cera den instalacion di Guarda Nos Costa, segun e mandatario.
E hecho aki a pone cu Guarda Nos Costa a bin cu e peticion cerca e minister di Husticia pa asina mas pronto nan por yega na facilidadnan di urgencia pa nan por expande nan capacidad di detencion.
Bikker a declara cu Guarda Nos Costa mes a recomenda un compania. Nan ta bezig pa logra e capacidad di expansion cu ta wordo financia cu fondo di Hulanda, y cu a wordo aproba pa e meta aki. E no sa e nomber di e compania ainda, ya cu e ta a base di recomendacion cu e mandatario a haya for di Guarda Nos Costa.
E mandatario a bisa cu esaki a trece un reto cune. Nan ta topa cu personanan indocumenta, pero nos autoridad mester haci hopi esfuerso pa por retene nan, y evita cu e personanan aki por bolbe disparce den mundo di ilegalidad. Pero cu na final nan ta wordo expulsa pa nan pais bek.
