Mientras cu Hulanda kier bin cu reforma laboral, Flexibilidad laboral ta keda un dilema entre sindicato y gremio comercial

Den e landspakket Hulanda kier wak reforma y flexibilidad riba mercado laboral. Nan ta propone pa bin cu un analisis di e situacion actual y con nan por reforma of modernisa esaki. Ya caba e prome mandatario, Evelyn Wever-Croes a laga sa cu e topico aki lo wordo debati debidamente den e dialogo tripartiet entre gobierno, doño di trabao y sindicato.

Pa presidente di sindicato FTA, Hubert Dirksz e tipo di proposicion di flexibilisacion laboral ta contradictorio. Ya cu di un banda ta wordo bisa cu flexibilisacion y cambio den ley laboral lo aumenta empleo y lo duna siguridad di trabao. Pero pa FTA, esey no ta e caso.

Tampoco pa e sindicalista flexibilisacion laboral no ta bira un forma pa crea mas trabao bao di e hobennan. Aruba tin un porcentahe di 16% di desempleo di hobennan, cu e no ta considera alarmante compara cu otro paisnan.

P’esey e ta haya cu no ta tur punto cu Hulanda a trece dilanti ta puntonan cu por wordo aplica na Aruba, manera nan ta trece. E ta considera e dialogo como fundamental, specialmente e participacion di cada un di e sindicatonan y gremio comercial y otronan.

Sinembargo e ta haya cu nos mester ta realista cu Aruba su recuperacion economico lo bira un proceso, cu lo tuma su tempo pa sali for di e situacion financiero dificil cu e pais ta aden. Esaki ta nifica cu puntonan crucial, manera bahamento di gasto di aparato gubernamental di pais Aruba, ta keda un di e discusion principal cu Hulanda.

ATIA

Como gremio comercial, directora di ATIA, Michelle de Groot, ta mira e tipo di flexibilisacion laboral di otro forma. El a bisa cu como gremio nan tin añanan cu ta boga pa bin cu reforma riba tereno laboral. P’esey nan ta mira cu e tema aki ta inclui den e landspakket pa asina cuminsa papia riba dje.

Contrario na e sindicato, ATIA ta wak oportunidad pa e trahadonan tambe. “Mas flexibilidad mas tin oportunidad pa duna mas hende trabao,” el a bisa na Bon Dia Aruba.

Ademas e ta haya cu si bo ta un trahado cu ta produci y cu ta un bon trahado, pues bo no mester tin miedo di flexibilidad laboral.

De Groot ta sinti cu e parti aki ta wordo lubida. Den berdad den un relacion di trabao por tin contract di cierto tempo, pero e ta mira cu e mercado laboral a cambia tambe. Tin un generacion nobo cu ta desea di tin trabao part-time. Nan ta desea di tin mas flexibilidad den e mercado laboral tambe.

Na final directora di ATIA ta kere cu mester mira cada aspecto di e proposicion di bin cu un flexibilidad laboral y no sin mas ‘bari for di mesa.’