No tur problema cu Vereniging Rijscholen Aruba (VRA) a trece dilanti relaciona cu rijbewijs examen no a wordo soluciona ainda. Pero di otro banda VRA ta mira cu preocupacion cu adicionalmente a dicidi pa Sr. Wilfred Harms kende ta miembro di e comision cu minister Andin Bikker a lanta pa atende tur asunto relaciona cu e problemanan cu VRA a yega di trece dilanti, no lo sigui mas den e comision aki.  

 

Thomas Ruiz kende ta presidente di e asociacion aki ta considera esaki como un noticia no mucho agradabel. Sr. Harms kende tabata na disponibilidad di e mandatario su contract cu e comision lo termina fin di luna aki. VRA ta haci un apelacion na e mandatario pa reevalua esaki, y si ta posibel pa prolonga Sr. Harms su contact.

 

Bon Dia Aruba a puntra presidente di VRA cual ta e motibo tras di e peticion aki. Ya cu ta keda prerogativo di e mandatario pa renoba of no e contract aki. Sr. Ruiz a argumenta cu Sr. Harms ta un persona hopi esencial den e comision a base di su experticio y conocemento. Nan ta cualidadnan cu nan ta mira cerca Sr. Harms pa nan por drecha e calidad y servicio cu tin na Bureau Examen Rijbewijs (BER).

 

BER cera pa dos siman

Di otro banda, Ruiz cu ta representa e rijscholen a trece informacion riba loke ta pasando den BER, caminda nan lo keda cera pa e proximo dos siman. Esaki ta trece cune un retraso adicional riba rijbewijs examen di loke ya a wordo ocasiona entre otro pa causa di e pandemia.

 

Ruiz a bisa cu e decision ultimo aki di cera BER pa un temporada, a confundi hopi hende. Pasobra siman pasa diabierna, BER a cuminsa duna fecha nobo pa examen y awor a bin e noticia cu nan ta cera. VRA ta spera cu ta pa dos siman so y no mas cu esey. E decision aki a trece confusion cerca e interesadonan di pasa e examen aki cu ta alumnonan di nan scol. Pues esunnan cu tin un fecha e siman aki pa nan examen, esaki no lo tuma luga dor di Covid. Ta asina cu dor di e situacion actual di e Covid, BER a tuma e decision hunto cu Cuerpo Policial (KPA) pa cera pa dos siman.

 

VRA ta spera cu BER por tuma e dos siman aki pa dedica mas tempo pa por caba cu e sistema digital di e otro categoria cu falta (A-C-D-E.) Y tambe pa nan por update tur cos cu nan tin pendiente ainda, ya cu e trabao a acumula pa nan entre otro pa falta di personal. Ruiz a bisa cu ta un necesidad grandi pa nan di VRA cu kier drecha e servicio y e calidad di examen.

 

Hopi hende ta wardando riba nan rijbewijs pa BER bin cla cu nan pa diferente motibo. Un di nan ta laboral pa e hendenan cu ta traha den transportacion por mantene nan trabao. Otro motibo tin di haci cu e situacion actual di Covid riba nos isla. Hopi hende a opta pa no bay den transporte publico pa evita cualkier contagio.