E pago di impuesto riba vehiculo di motor ta tumando luga for di dia 25 di november ultimo, asina departamento di Impuesto (DIMP) ta duna oportunidad pa reflexibilisa e pago prome cu fin di januari 2021.

Pa aña 2021 lo sigui uza e mesun plachi di 2020, y tampoco e departamento di Impuesto (DIMP) no por bini cu e sistema di sticker, manera nan a yega di haci’e den pasado. Esaki debi cu experiencia cu nan tabatin den pasado a mustra cu sticker tambe ta wordo falsifica.

Control

A pesar di e facilidad di pago aki, departamento di Impuesto ta consciente cu incumplimento ta keda. Ya cu tin un grupo cu ta keda sin cumpli debidamente cu e compromiso di paga e belasting aki. Pues lo tin hende cu lo kier probecha di e situacion aki, caminda nan ta bay core sin e belasting paga y te hasta sin e seguro paga. E situacion aki nan ta premira cu lo por aumenta berdaderamente, pero departamento di Impuesto ta sigur cu departamento di polis lo sa di ataca e situacion aki debidamente.

Tin un grupo di trabao di DIMP cu den futuro cercano lo permiti cu si un cliente ta bay paga, personal di belasting por wak via nan sistema automatisa, si e seguro ta paga caba. Pero tambe si polis ta riba caya, automaticamente si nan ta coriendo tras di un auto, nan por tuma nota di e number di plachi y via nan sistema nan por check si e auto su belasting y seguro ta paga.

Den e direccion aki departamento di Impuesto ta bayendo mirando cu e cantidad di auto ta aumenta hopi tur dia. Actualmente nan ta mas cu 88 mil auto registra cu ta demanda un miho sistema pa controla nan, si berdaderamente nan ta cumpliendo cu tur exigencia cu ley ta prescribi.

Sinembargo pa loke ta e boet di parti di DIMP nan ta saca e cobransa adicional of boet pa incumplimento. PR di e departamento di DIMP, Meverly Romano a yega di declara cu e 50% di boet riba e balor di e belasting aki ta keda. Pero tambe si polis ta haya bo riba caya, nan por duna bo boet cu despues bo mester paga cerca Ministerio Publico (OM).

Control policial

Vocero di Polis, Lito Lacle a bisa cu berdad tin cierto periodo cu for di departamento di Impuesto, polis ta haya e lista di esunnan cu a paga number di auto si of no. Cu e lista aki elabora dor di DIMP, nan ta traha pa realisa nan tarea di control riba caminda.

Tur esnan cu ainda no a cumpli cu e belasting aki, cuerpo di polis su tarea ta pa controla esaki, el a bisa. Te ainda tin basta plachi oraño cu ta coriendo rond, pero polis lo sigui controla nan, ya cu nan a haya tur e lista recientemente for di DIMP. Pero no solamente e lista, sino cu pa polis ta hopi importante e comunicacion cu DIMP pa asina nan por traha mas eficiente y mas efectivo; y e comunicacion t’ey caba.

Lacle a bisa cu den diferente departamento ta bezig cu un sistema cu ta bay automatisa no solo e control riba pago di belasting y pa seguro tambe, locual esaki lo facilita polis su trabao di control. Ta asina cu si nan ta hinca e number di auto sospecho den nan tabel, polis por sa directamente cu e number aki ta paga y tambe su seguro. Pero aworaki polis tin cu traha cu e situacion manera cu ta. Kiermen cu si polis mester traha ainda a base di e lista haya for di DIMP, nan tin cu traha cune, no tin otro manera. “E unico cos cu nos por haci bon cu otro ta comunica y traha mas cera cu otro,” segun Lacle.

Te ainda nan no tin e instrumento necesario a base di tecnologia digital moderno. Nan tin un unidad motorisa cu ta realisa control cu practicamente nan ta 10 miembro riba caya, y tambe polis di trafico. Te aworaki mas cu 2 mil boet a wordo reparti. Mientras di otro banda e casonan di dalmento a baha drasticamente dor di Covid pa causa di e medidanan cu a restringi e coremento di auto, vooral den oranan di anochi y madruga.

Loke si a subi hopi ta e fenomeno di “hit and run.” Tin diferente factor relaciona cu e fenomeno aki. Un di nan por ta cu e hendenan no ta consciente cu esaki ta un acto castigabel pa ley cu un aña of mas di prizon of boet di mas cu 25 mil florin. Tambe podise cu e persona cu a dal otro auto y bandona e sitio, no tin nan documentonan na ordo. “P’esey nos control mester sigui,” segun Lacle.

Finalmente el a pone pueblo na altura mirando e temporada aki di fiesta di Pasco y Fin di Aña cu polis tin personal cu ta bin cu control mas extenso riba caya keto bay. E ta haci un yamado pa cada un di nos cumpli cu nos deber como ciudadano di paga bo belasting y bo seguro pa evita un boet pisa.