Trahadonan di Excelsius Casino ta sigui preocupa pa nan problemanan laboral cu e operador di e casino aki. E problema aki a surgi memey di e crisis actual di e pandemia, cu a haci nan situacion mas dificil ainda.
E trahadonan aki for di fin di maart na momento cu e crisis a dal nos pais, manera tur otro luga, e casino aki a cera. Pero cu e diferencia cu e otro casinonan na Aruba, cu e dunado di trabao a duna e trahadonan un carta, caminda el a informa cu no lo opera mas e casino menciona. Argumentando tambe cu nan contract cu e doño di e establecimento tabata caba fin di april, e operado di e casino a dicidi di pidi bancarota di e compania.
Pa atende e asunto aki y buscando un solucion na nan problema, e trahadonan a bati porta di departamento di Mediador di Gobierno, caminda nan a combersa cu abogado Falconi, kende ta representa e compania. El a bisa cu nan a cuminsa cu e proceso di declara e compania failliet alrededor di luna di april. Pero te awor ainda e caso no a wordo trata den corte. Tal parce cu ta falta algun documento pa corte trata e caso aki di bancarota formalmente.
Nan ta un grupo di trahadonan cu hopi aña di servicio, y actualmente nan ta den incertidumbre keto bay, pasobra nan a solicita pa Banco di Seguro Social (SVb) paga nan cesantia di nan añanan di servicio. Sinembargo for di SVb nan ta haya di contesta cu ainda nan ta pendiente di haya e sentencia di corte di bancarota di e compania, pa SVb por procede legalmente cu e pago aki.
Mientras tanto e trahadonan di e casino aki ta sin trabao. Un mayoria di nan a haya e compensacion y ayudo di e proyecto FASE. Sinembargo e situacion aki ta un problema grandi pa nan, ya cu normalmente nan presupuesto ta basa riba un salario formal di shen porciento, cu nan a yega di cobra te luna di maart ultimo.
Un biaha mas nan a yega di reuni cu minister di Labor recientemente ariba e asunto aki, den cual a wordo pidi pa purba di acelera mediante ley pa e trahadonan por haya nan añanan di servicio. Siman pasa e trahadonan a yega di bay SVb pa firma e documentonan cu ta parti di e proceso y ta wordo spera cu mas pronto cu laat, nan lo por cobra cesantia di nan añanan di servicio.
