Un grupo masha limita di 15 trahado ta esun responsabel pa atende cu e terminal y infrastructura di e refineria. Pero te ainda no ta conoci e status di e trahadonan aki, y tampoco nan dunado di trabou. Asina ex minister di Energia y Parlamentario di oposicion, Mike de Meza a declara na Bon Dia Aruba, ayera mainta.

El a bisa cu ta existi un ‘situacion di peliger potencial grandi.’

De Meza a expresa su preocupacion pa loke lo por sosode si un eventual accidente lo tuma luga, ya sea den e terminal of den e refineria mes. Esaki mirando cu e departamentonan cu ta atende cu candela den e refineria, y tambe esun cu ta atende cu oil spill of derame di crudo y medio ambiente, a keda elimina y no tin material pa atende cualkier calamidad.

Situacion di peliger.
E ta contemplando e posibilidad hunto cu su fraccion pa canalisa e situacion peligroso aki cerca Gobernador di Aruba y te hasta bay na Ministerio Publico (OM) pa haci un denuncia formal.

El a declara na e matutino aki cu refineria ta un compleho integral cu ta inclui e refineria mes y e terminal cu ta un parti importante. Aworaki tin 15 trahado pa concentra den e terminal so. Den otro palabra, un 80% di tur cos cu ta tuma luga den e resto di e compleho aki ta practicamente na su cuenta. Niun hende ta monitor esaki, si tin ladronicia no tin siguridad pa combati esaki. Tin linea di coriente sumamente halto cu ta core den e refineria y accidente lo por sosode. Ya cu tin escape di gas cu ta sumamente peligroso pasobra e por causa candela.

Ademas tin takinan y pipanan cu zeta, y algun di e pipanan yen di zeta no ta den bon condicion. Si algun di e pipanan aki ta cay den otro den lama algun miles di bari di zeta ta bay den awa. Actualmente nos no tin e capacidad ni e material pa responde inmediatamente riba un calamidad asina. “E ta un situacion sumamente dificil. Sigur pa un pais cu ta depende di su pilar economico cu ta turismo,” el a bisa.

Proximamente lo ta drentando un barco pa abastece nos pais cu combustibel, y e ta asumi cu e 15 trahadonan ta den operacion pa atende cune. Mientras cu tin asina tanto trabou envolvi pa atende un barco grandi, entre otro di inspeccion di e barco, sistema di pomp, etc…

Responsabilidad y denuncia.
Parlamentario De Meza a lamenta cu te aworaki prome minister encarga cu e cartera di Energia, no a informa parlamento riba e situacion actual, despues cu Citgo a ofrece e pakete di retiro na nan trahadonan.

Te fin di januari ultimo, Citgo Aruba Refinery (CAR) tabata responsabel di e operacion di e terminal y siguridad di e refineria. Aworaki no ta conoci si e compania estatal Refineria di Aruba (RdA) como doño di e propiedad aki a tuma over e responsabilidad aki. Pero gobierno no a bin cu mas claridad rond di e topico aki.

E ta haya cu repetidamente e gobierno aki ‘intencionalmente’ ta poniendo pais Aruba den un situacion peligroso pa cu e situacion di e terminal y refineria. Gobierno a finalisa un acuerdo cu Citgo, y no a bin parlamento pa responsabilisa bo mes.

“Bo no ta duna informacion na e representantenan di pueblo.” el a bisa.

E ta haya como si fuera intencionalmente gobierno ta neglisha e situacion di peliger cu ta nifica e instalacion di e terminal y refineria cu na fin di dia por yega un momento cu nos tur por lamenta di esaki. P’esey e ta haci un apelacion serio na gobierno pa trata e situacion aki cu tur seriedad y honestidad.

Eynan e ta haya cu den su rol como parlamentario y representante di pueblo, nan lo cana e caminda pa alerta OM riba e situacion aki cu e ta denuncia publicamente. Pero si OM no kier haci nada, cada instancia mester carga su responsabilidad, y tambe nan ta evaluando pa bay Gobernador pa alert’e tambe di e situacion peligroso aki.