Mientras cu companianan di afo ta hayando proyecto grandi: Companianan di construccion local ta pasando den duro

Vocero di WAB, Wim Hoenink a vocifera e preocupacion cu ta existi den sector di construccion cerca e companianan cu ta afilia na e asociacion aki. Shete compania di renombre y legalmente estableci na Aruba ta cay bou e dak di WAB, nan ta: Albo, Bohama, AWM, Croon Caribe, Thiel Resources, Thiel Corporation y Bopel Technical Services.

Hoenink a bisa na Bon Dia Aruba cu un motibo cu a haci cu nan a tarda hopi pa por a firma un contracto colectivo (CAO) cu sindicato STA, ta debi cu e circunstancianan ta birando cada bes mas dificil pa e compania di construccion serio. Y esaki ta conta no solamente pa e dunado di trabou, sino pa e trahadonan tambe.

Nan ta haya cu e posibilidad pa logra cierto proyecto di construccion a bira dificil pa nan. Specialmente nan ta sinti cu e compania di construccion estableci legalmente na Aruba, ta den un posicion di desbentaha compara cu esunnan cu ta bin di afo. No solamente un factor tin di haci cu belasting (BBO), pero tambe riba e echo di trece trahadonan di afo, etc…

El a bisa cu BBO -cu ta un belasting pa tur hende ta paga- definitivamente e no ta un bon ayudo pa e companianan cu ta opera localmente den e sector di construccion. Pero nan no kier bira egoista di pensa riba nan mes, pero tambe nan por mira cu BBO ta afectando otro sorto di negoshi, tanto grandi como chikito na Aruba. Sinembargo nan no ta mira un solucion inmediato na e problemanan aki.

“E bida na Aruba pa e empresarionan local a bira pisa durante e ultimo añanan definitivamente,” el a bisa. Lamentablemente lo pio ta cay cerca e clientenan cu na final ta esunnan cu ta paga pa e trabou cu a wordo realisa.

Encuanto e proyectonan hotelero grandi cu a wordo anuncia, entre nan Secrets Baby Beach y Sint Regis Resort, vocero di WAB ta mira cu e operador ta esun responsabel con e ta ehecuta su proyecto. Tur compania local cu ta cay bou WAB ta dispuesto pa participa den e tipo di proyectonan asina. Pero nan ta mira cu e accesibilidad y asignacion di proyectonan di e embergadura aki ta bira dificil pa nan.

Segun Hoenink, varios di e proyectonan grandi aki cu a wordo anuncia, pero cerca nan no ta existi niun compromiso of obligacion pa e operador di e proyecto por contrata e trabou profesional di companianan local.

“Nan t’ey, pero no ta existi niun obligacion pa nan por traha cu e companianan local,” vocero di WAB a bisa na Bon Dia Aruba. E no ta desconoc’e cu for di un punto di bista di concurencia, vocero di WAB ta haya cu esaki ta logico, pasobra bo no por obliga legalmente e operador of doño di e proyecto pa haci esaki cu un compania specifico.

Kiermen si e mesun desaroyado di e proyecto ta dicidi di trece trahadonan y materialnan di construccion di afo, no tin nada di haci na Aruba. Esaki ta un factor di atencion y preocupacion cu e companianan di construccion legalmente estableci na Aruba tin actualmente.