Ex minister di Energia y parlamentario actual di oposicion, Mike de Meza (AVP) a referi na e situacion cu ta reinando cerca e trahadonan di e refineria na San Nicolas. Despues cu dia 27 di december ultimo, Citgo Aruba Refining N.V. (CAR) a presenta un oferta di retiro di su empleadonan, ya cu pa fin di luna aki nan ta stop nan operacion na Aruba.

Den e carta aki segun De Meza, ta bisa bon cla tambe cu el a wordo manda a base di exigencianan di gobierno. “Na otro palabra cu gobierno di Aruba di un forma of otro a negosha of palabra cu e compania Citgo, cu Citgo mester termina e laso di trabou cu tur e trahadonan aki,” el a bisa

E ta considera esaki como un ‘problema serio y alarmante’ pa cu e trahadonan, ya cu e ta un decision cu ta conta pa e hendenan cu ta traha permanente cu CAR, y contratista tambe cu tin den e refineria. El a menciona e cifra di 75 trahado na servicio directo di CAR y alrededor di 50 contratista cu ta bin laborando durante e ultimo dianan den e refineria.

Encuanto cu CAR no ta hayando e recurso necesario pa sigui cu e plan di rehabilitacion di e refineria debi na e embargo cu Merca a impone riba e regimen di Nicolas Maduro di Venezuela, e parlamentario tin su propio opinion. De Meza a bisa cu “Aruba no ta parti di Venezuela.” Pues e embargo cu tin na Merca pa cu PDVSA ta cu Venezuela y relacionnan directo pa cu PDVSA. Ya cu Aruba su negociacion a tuma luga cu Citgo Corporation na Huston, y “nunca a negosha cu PDVSA,” el a bisa.

Encuanto tempo cu nan a firma e contract na Venezuela, parlamentario De Meza a splica cu tabata e representantenan for di Citgo Aruba cu e shareholder mas grandi, y tambe cu presidente Maduro. Tur esaki pa mustra e compromiso cu e accionista tabatin, pero no tabatin niun negociacion, segun De Meza. “E embargo ey no tin nada di haci cu Aruba,” el a bisa.

Situacion di trahadonan.
Parlamentario De Meza a indica cu nos ta papiando di 125 trahado di Citgo na pia di trabou cu nos no sa kico lo para cu nan. Igualmente el a bisa cu e pakete cu a wordo ofrece ta un ‘pakete marginal’ cu e trahadonan sigur no ta di acuerdo cune. Di otro banda e sindicatonan a vocifera cu nan kier sinta na mesa cu gobierno, mientras cu gobierno ta bisa cu e no tin nada di haber cu e negociacionnan entre Citgo y su trahadonan. Pero e parlamentario di oposicion ta haya cu ta gobierno mes a sinta cu nan den dos ocasion durante e ultimo mita di aña di 2019.

Den e reunionnan aki gobierno a bisa nan kico su intencion ta caminda gobierno kier a crea un comision cu participacion di sindicato aden. Pero t’ey dia di awe e comision aki no a wordo lanta of mas bien -segun e parlamentario- e sindicatonan y e trahadonan no a haya participacion den esaki.

E ta haya cu gobierno di Aruba mester sinta cu e diferente partido envolvi te hasta cu Hulanda, y mantene Citgo responsabel pa e contracto cu e tin. Ya cu Citgo na Merca ta sigui inverti. “E ta un di e compania di zeta na Merca cu e fondo den reserva mas grandi cu tin cu biyones y biyones di dollar,” el a declara.