Segun minister di Finanzas y Asunto Economico, Xiomara Maduro, e bashi premie di e empleadonan di sector publico lo wordo paga normal.
El a bisa na e matutino aki cu e bashi premie no ta forma parti di e 12.6% riba cortamento den gasto di personal como condicion di Hulanda pa e cambionan haci debi na e pandemia.
Encuanto pago di bonus pa fin di aña, e mandatario a clarifica cu ta e ambtenaarnan cu schaal hopi abao ta haya un bonus na december di 200 florin. El a splica cu schaal 1 te cu 6 dienstjaar 5, cu tin un bruto salaris di 3.425 florin ta haya e bonus di 200 florin na december.
Mientras cu manera el a yega di bisa na e matutino aki pa e ambtenaar locual a cambia ta e 5% den salario, 50% vakantieuitkering y 50% di e premie di augustus y november. Esaki lo sigui te proximo aviso. Esey ta e unico cambionan.
Sinembargo cada tranche di prestamo tin condicion.
Te cu awor ta esaki ta e condicionnan riba mesa pa locual ta cortamento den gasto di personal, segun minister Maduro. Por lo otro tur cos a keda mescos cu prome cu e pandemia, y e mandatario no ta expect mas condicion di Hulanda riba e puntonan aki.
