Awe dos accion di protesta ta tuma luga: Mainta un grupo di ciudadano ta bay manifesta nan mal contento riba maneho y otorgamento di ayudo via Fondo di Asistencia Social di Emergencia (FASE).
Mientras cu awe tardi pa 3or, un biaha mas Sindicatonan di Maestro di Aruba a convoca na full veld di enseñansa, tanto miembro como no miembro di SIMAR. Pero tambe mayornan cu kier sostene nan marcha di desconfiansa saliendo for di ex edificio di DOW.
Mientras tanto ainda ta existi preocupacion y disgusto cerca un grupo sindical di empleadonan publico riba e forma con gobierno a corta for di nan salario. Pero e falta di claridad cu tin, sin nan lo sigui corta mas den nan salario pa tempo indefini. Sin cu niun hende ni parlamento por tin algo di bisa.
E clima di no conformidad aki ta esun cu ta reina actualmente tanto den sector publico, pero tambe priva riba e situacion laboral actual. Adicional na e clima di tension y malcontento aki, no mester lubida e situacion di ordo publico cu e isla bisiña Corsou, y partner den reino, ta pasando aden pa circunstancianan casi similar. E preocupacion aki a sali afo durante un reunion cu varios sindicato di sector publico, SIMAR, SEPPA, SPA y SADA a sostene den parlamento diahuebs ultimo.
Presidente di Sindicato di Aduana di Aruba (SADA), Edward Maduro a declara na Bon Dia Aruba cu e sindicatonan a bolbe expresa nan preocupacion, manera nan a haci recientemente dilanti conseho di minister, riba e concepto di ley cu ta regarda ambtenaar. No tin compromiso entre e sindicatonan pa bin of no cu accion prome cu e concepto di ley controversial aki lo wordo trata na Parlamento. El a splica cu cada sindicato ta independiente y cada un di nan tin nan miembronan cu na final ta esunnan cu ta defini si lo bin cu accion of no.
E sindicalista Maduro a bisa cu tur cos ta keda den man di e miembronan di cada sindicato. Pero no mester descarta cu e preocupacion ta grandi bao e miembronan. El a referi na su propio sindicato, caminda SADA no a bay den niun accion te aworaki, pero esey no ta kita cu nan miembronan ta hopi decepciona y preocupa pa e situacion cu ta reina cerca e ambtenaar. “Y sigur mal contento. Pasobra tin un cos cu no a cana manera debe ser,” el a bisa.
E ta haya cu e mesun minister president ta reconoce cu tin cosnan cu a bay diferente na comienso pa locual ta e parti di dialogo cu pa SADA no tabatin. SADA ta condena cu e hecho cu mientras cu tin un minister presidente cu ta purba trece un miho ambiente di dialogo, otro minister ta trece den social media cu SADA tin otro agenda.
“Esaki no ta contribui na e dialogo den un forma pasivo… Tin otro nan cu no ta worry y nan ta purba tira gasolin riba e candela,” el a declara na Bon Dia Aruba.
Maduro a bisa cu nos tur, un mas cu otro, ta bibando e crisis aki. E ta keda na cada sindicato y nan miembronan pa dicidi e direccion cu nan lo kier bay. Ta logico cu ora e sindicatonan ta reuni hunto, nan ta comparti e pensamento di cada un. Pero na final di dia ta e miembronan ta dicidi riba e sindicato cual direccion nan kier bay. Den esey SADA ta kere cu mester respeta opinion y pensamento di otronan, ora cu nan kier para pa nan derechonan. Vooral e sindicatonan cu ta actua a base di mandato di nan miembronan.
Un grupo di sindicatonan di sector publico a yega di vocifera nan preocupacion pa algun articulonan specifico 3, 7 y 8 di e concepto di ley aki cu pronto lo wordo trata den Parlamento. P’esey nan a tene un audiencia den parlamento diahuebs ultimo. Nan speransa despues di e reunion aki tabata cu Parlamento lo por bin cu amienda riba e concepto di ley aki, pa asina e ambtenaar por ta mas trankilo. E matutino aki lo trece mas detaye riba e reunion den otro edicion.
SADA ta spera cu e situacion por normalisa pa asina pais Aruba por tin un trankilidad den e mundo laboral en general.
