E pais nordico na 2021 a anuncia e creacion si un red amplio di stacion pa auto di hidrogeno berde. Dos aña despues, sin mercado, ta reconociendo cu ta trata di un proyecto fracasa. “Nos no por hustifica mas placa den subsidio,” segun e pais.

Mobilidad y hidrogeno berde no ta bay man den man, segun un articulo riba website lapoliticaonline.com. E proyectonan fracasa ta cuminsa replica pa e limitacionnan tecnico – adverti pa cantidad di experto – y pa un mercado cu, a pesar di inversion den infrastructura, ta keda sin aparece.

Algun siman atras, LPO a adelanta cu gobierno di Niedersachsen na Alemania, e prome na henter Europa pa opera trein di hidrogeno, a bandona su plan pa motibo di “mal resultado.”

Awo, esun cu ta rindiendo ta Dinamarca, e pais Europeo cu a gasta mas placa den duna impulso na e auto di hidrogeno. E empresa a cargo di duna impulso na e stacionnan di recarga a confirma e desmantelamento di e instalacionnan.

“E produccion di hidrogeno berde na Dinamarca ainda no ta cla. Ni electrolisis, ni truck cisterna, ni e stacionnan ta asina madura manera tabata spera na momento cu nos a lansa nos ambicionnan. Esaki, uni na e falta di volumen di banda di fabricantenan di auto, a hacie dificil pa haya un modelo di negoshi pa explotacion di e stacionnan di hidrogeno,” segun a lamenta Jacob Krogsgaard, director general di Everfuel, e compania cu a anuncia un red di 19 stacion pa fin di 2023 pa transforma e vector renobable aki den un “alternativa viable pa gasolin, diesel y bateria.”

Un di e motibonan principal pa stop e inversionnan ta e revocamento enorme di placa cu Merca, UE y e empresanan ta invertiendo den e tecnologia aki. “Nos no por hustifica pa destina mas placa unicamente pa subsidia hidrogeno,” Krogsgaard a admiti, segun e corant digital Danes, Energiwatch.

Everfuel tabata considera un hecho cu, ya pa awo, e mobilidad di hidrogeno lo tin un mercado caba. E eror den e calculacion aki a nifica un deficit den prome seis luna di aña, di 10.9 miyon corona Danes – como 81 miyon euro.

Dinamarca, manera hopi pais di UE, ta experiencia un crecemento exponencial den benta di auto electrico, prototiponan cu si tin un mercado real y solido. Mientras cu e parke automotor Danes tin actualmente apenas 136 vehiculo propulsa pa hidrogeno, di cual gran mayoria ta auto comparti y taxi. E ultimo auto di hidrogeno pa uso priva a matricula na januari di 2022.

Mas leu cu e fracaso di e treinnan na Alemania y e autonan na Dinamarca, mayoria di pais Europeo, incluyendo Spaña, ta sigui para pa e tipo di mobilidad aki, inflando un burbuha cu ta continua crece danki na ayudo y subsidio.

Por ehemplo, siman pasa, Transports Metropolitans de Barcelona (TMB) a anuncia e compra di 36 bus nobo propulsa pa hidrogeno. E compra a costa 23.396.400 euro, cual su financiamento a bin for di fondonan di Next Generation EU.

Den ultimo dianan tambe a bira conoci cu Solaris, filial di empresa vasco CAF, ta bay suministra 200 bus di hidrogeno na Europa pa 150 miyon euro. Gobiernonan local di ciudadnan manera Venecia (Italia) y Koln (Alemania) ta invertiendo den e tecnologia aki.

Loke ta berdad ta cu e proyectonan fracasa den materia di mobilidad ta parce di confirma e advertencianan di cantidad di experto tocante e eror strategico grave di pusta pa hidrogeno berde fuera di e instalacionnan industrial unda e tin un rindimento comproba. “E apuesta mester ta superdita na e evolucion di demanda, y no, exclusivamente, e promocion di infrastructura y di un oferta den cual ainda gran parti di su desaroyo tecnologico ta pendiente,” segun Fundacion Renovables y Greenpeace Spaña a pidi den un manifesto publica na maart tocante e incongruencianan enorme (politico, tecnico, economico y social) di e plannan di Brussels y di Moncloa tocante e vector energetico aki.

Hidrogeno no ta bay tin impacto riba bida diario

“Nos mester lubida e idea cu, den futuro, ta bay yega cerca nos un combustible limpi manera hidrogeno unda actualmente nos ta haya gas natural. Nos hogar, auto, nos bida diario no ta bay ta basa riba hidrogeno. Esaki ta algo cu no ta bay tin ningun impacto riba bida diario di hende, sino solamente di algun empresa,” segun ta bin ripitiendo durante lunas Fernando Ferrando, presidente di Fundacion Renovables, tocante e “soñonan megalitico” di Europa pa cu hidrogeno berde.

Den mesun linea ta bin pronunciando David Cebon, profesor di ingenieria mecanico na Universidad di Cambridge y miembro di Coalicion di Ciencia di Hidrogeno, un organisacion crea pa academico y investigador pa duna ma sinformacion tocante e futuro di hidrogeno.

Aña pasa, na Asamblea Global riba Hidrogeno Berde na Barcelona, inaugura pa e minister di Transicion Ecologico, Teresa Ribera, a laga cla cu algun di e usonan cu ta dunando na hidrogeno berde “ta altamente ineficiente.”

“Bus di hidrogeno ta consumi entre tres pa cuatro biaha mas electricidad cu loke un bus electrico ta consumi. Electrifica e vehiculonan directamente ta hopi mas efectivo,” el a aclaria tocante e inversionnan aki.

Hydrogen Valley

For di e portanan di Aruba su refineria, augustus ultimo Minister di Energia, Sr. Glenbert Croes a anuncia na henter comunidad, cu e Companianan di Gobierno, Utilities, WEB, ELMAR y RDA a firma un MOU (memorandum of understanding) cu e multinacional Acciona Energia, pa e desaroyo di un ‘refineria di hidrogeno’ y pa, tambe hunto cu un valley di hidrogeno, desaroya otro componentenan di inversion energetico, plantanan hidrokimico cu ta bay produci diferente productonan basa riba hidrogeno cu lo nifica e transformacion di Aruba su refineria.

Manera Bon Dia Aruba a publica den su Editorial di dia 30 di augustus ultimo, “riba su website e compania a confirma tambe e convenio y a duna algun detaye di loke e proyecto ta encera. Y di inmediato ta surgi aki algun interogante, no tanto pa loke e compania ta bisa di bay haci, sino mas bien e proyecto manera e mandatario ta mira esaki. Kico ta e caso?

“Nan no tin ni un plan pa exportacion, loke nos no ta haya straño, pasobra nos a publica ampliamente riba e desafionan pa logra esaki, mirando e desaroyonan di hidrogeno den nos region. E plan di un compleho industrial cu hidrogeno como base na e momento aki no ta mas anto cu plannan no divulga o splica di gobierno di Aruba. Nos por imagina cu nan no ta asina leu ainda pa duna mas detaye di kico realmente e expansion den un ‘hydrogen valley’ ta bay encera.”