Seguro Medico General (AZV) a informa cu un grupo di pashent local cu a wordo manda pa tratamento na Colombia a wordo treci bek pa Aruba cu aprobacion di nan specialista.
Mientras cu otro grupo lo keda na Colombia pa sigui nan tratamento, segun recomendacion di nan specialistanan. Representante di AZV, Lucy Laclé-Strijdhaftig a bisa cu ningun pashent cu ta na Colombia no ta bin Aruba, si medicamente e no por. El a bisa cu 65 pashent a keda Colombia. E cifra total ta bira dobel, kiermen alrededor di 130 persona debi cu nan ta bay cu nan respectivo acompañante. Si nan no ta haya aprobacion nan no por bin bek Aruba, pasobra nan tratamento no por wordo interumpi.
Laclé-Strijdhaftig a laga sa cu no tabata facil pa trece nan for di Colombia, mirando e cancelacion di vuelo cu tin debi na e medidanan cu a wordo implementa. Den e delaster dianan AZV a haci hopi esfuerso, te hasta a wordo haci uzo di vuelo charter, pa trece mas tanto pashent posibel for di Colombia.
Ayera 20 pasahero a yega abordo di e vuelo di Avianca. Nan ta pashentnan cu a bin for di Cali, Bucaramanga y Bogota. AZV a laga sa cu e pashentnan cu a regresa Aruba, tur a conta cu aprobacion di nan specialistanan cu ta trata nan no solamente na Colombia, pero na Aruba tambe. Na momento cu e pashent aki tin cu regresa, AZV lo manda nan na e mesun clinica y ciudad, unda nan a bay inicialmente.
AZV a informa cu lamentablemente e pashentnan cu nan tin na Hulanda, nan no por trece nan bek. Pa motibo cu e vuelo pa awe no ta bay sosode mas, debi cu e frontera ta cera. Igualmente nan tin algun pashent na Merca, caminda AZV lo haci tur esfuerso pa trece nan bek prome cu Merca lo cera su frontera pa vuelonan comercial.
