Mientras barnan na San Nicolas ta cera; Aumento exorbitante di prostitucion ilegal rond di Aruba

Prostitucion ilegal a aumenta exorbitante rond di Aruba. Considerando cu e ta un actividad ilegal, e ta totalmente for di control, conociendo un novedad of servicio nobo bao e nomber di ‘hende muhe pre-pago’.

Pre-pago

E negoshi di prostitucion ilegal tin nan modus operandi. Tin di nan cu ta ofrece habri e servicio di ‘escorts’ via internet. Pero e tendencia nobo di e negoshi aki ta esun di prostituta ‘pre pago.’

Nan ta haci uzo di Tinder app cu a bira un aplicacion popular pa conoce otro hende caminda bo por chat cu otro, y te hasta bin cu cita. Asina e prostituta pre-pago ta pone su prijs, forma di pago y sitio di encuentro. E ta opera manera social media, caminda bo ta pone bo nomber, edad, potret di perfil, preferencia, localisacion, etc… pa asina logra un encuentro. Asina e negoshi di trahado sexual pre -pago ta opera na Aruba tambe.

Algun di nan ta traha den bar cu a sigui opera. Nan a uza e triki di ofrece algun “snack” na nan clientenan, pero e negoshi real ta e servicio cu nan trahado sexual ilegal ta ofrece. Tambe tin casnan situa den sitio strategico, y cu nan no ta bira niun problema, ya cu nan no ta bistoso, nan ta traha paden.

Un miembro di SANIBAR cu ta e asociacion di e doñonan di bar na San Nicolas a declara cu nos autoridad y gobierno ta na haltura di e situacion aki, ya cu nan a yega di manda carta pa nan.

Dialuna ultimo, Bon Dia Aruba a aborda minister di Husticia, Andin Bikker riba e topiconan di e trahadonan sexual cayehero y problematica di e taxistanan pirata, y tambe e falta di control pa combati e problemanan aki. E mandatario ta haya cu un parti di e control ta resorta bao su ministerio. Pero el a pidi un tempo prudente pa duna un contesta den su totalidad riba e topiconan aki.

Prostitucion ilegal

E problema aki cu a bira un menasa pa salud publico, no solamente pa e peliger di e sorto di malesa transmiti sexualmente, sino pa e problematica actual di e pandemia.

Un siman despues cu dia 13 di maart ultimo e dos prome caso oficial di Covi-19 a wordo registra na Aruba a trece cune e medidanan di shelter and place y toque de queda. Nan a haci cu tur e barnan estableci den e area di tolerancia na San Nicolas a cera y te ainda nan ta cera. Nan ta un di e sectornan cu mas a sufri e impacto economico di e pandemia aki. Mientras cu den otro paisnan e tipo di negoshi aki a cuminsa opera caba bao cierto protocol.

Mayoria di nan trahadonan sexual cu ta eherce legalmente un di e ofishi nan mas bieu di mundo ta bin di afo. Actualmente DIMAS no ta otorgando niun permiso na e doñonan di bar afilia na SANIBAR pa trece nan trahadonan sexual principalmente for di Colombia y Republica Dominicana.

Si e doñonan di bar no por trece nan trahadonan sexual di afo dificilmente nan por opera. Solamente si nan por haya persona local no importa cu ta dispuesto pa haci e trabao aki. Pero e ta un cos dificil y complica, mirando cu nos poblacion ta chikito y un ta conoce otro. Mientras por ehempel Hulanda tin un poblacion rond di 17 miyon hende y e ta situa den continente Europeo.

Dia cu gobierno di Aruba a bin cu e lock down, un total di 31 hende muhe trahado sexual a keda pega na Aruba mas cu tres luna cu ta e termino cu nan permiso ta caduca. Algun di nan a keda 6 luna, pero nan doño di trabao cu ta esun garante y responsabel di nan, a haci tur esfuerso pa medio di vuelonan humanitario pa nan trahadonan bay nan pais bek, y nan tur a bay.

Aworaki ilegalmente tin negoshinan, casnan y te hasta sitionan cu ta opera como boutique hotel, caminda e trahadonan sexual ta brinda nan servicio, sin cu nan ta paga belasting y sin control di salubridad publico loke ta pio ainda. Nan ta funciona sin mayor problema na San Nicolas, Palm Beach cerca e area hotelero, Noord y tambe den pleno curason di Oranjestad, cerca di warda di polis di Playa.

Sinembargo tin hendenan cu ta aproba e situacion actual cu e barnan na San Nicolas ta cera pa sigui cu e negoshi di forma ilegal, locual SANIBAR ta condena totalmente.

Competencia inhusto

E trahadonan sexual cu ta brinda e servicio aki ilegalmente, un parti di nan ta hende muhe Venezolano cu a haya asilo politico, pero cu nan no mag di traha. Pero cu nan no tin entrada ni mucho alternativa pa sobrevivi cu ofrece nan curpa pa placa.

Tambe tin algun di nan mas veterano conoci den e baho mundo di prostitucion na Aruba, ya cu nan tin mas tempo realisando e trabao aki cu e famoso y controversial trahado sexual conoci como ‘La Poderosa’ cu a permanece mas cu un aña y mey akinan.

Pero aworaki mas trahadonan sexual ta sigui drenta como turista. Esaki ta bin sosodiendo for di e prome dia cu nos frontera a cuminsa habri gradualmente, vooral cu Republica Dominicana y Colombia. Algun di nan ta hendenan muhe cu ya caba ta conoce e mercado local ya cu nan a yega di traha di forma legal den e barnan na San Nicolas. Pero awor nan ta haya mas atractivo pa traha ilegalmente, ya cu e pida di bolo cu nan ta bay cune ta mas grandi.

E ta un panorama cu tin preocupa e doñonan di bar na San Nicolas cu pa añanan ta bin operando legalmente cumpliendo cu tur belasting, permiso di DIMAS y exigencianan di DVG. Mayoria di nan a cumpli cu tur cos menos cu SVb debi na e caracteristica di nan negoshi. Nan trahadonan ta hende muhe cu ta bin pa un periodo maximo di 3 luna. Pero e pandemia aki a pone e doñonan di e 33 bar situa na San Nicolas den un lucha constante pa sobrevivi. Algun di nan a haya e ayudo limita di FASE. Mientras cu nan gastonan pa luna y compromiso financiero ta surpasa mas cu 2.500 florin.

Nan ta mira cu e lunanan ta pasa y nan ta den un incertidumbre total. Nan spera cu pronto nan lo por haya un solucion satisfactorio for di DIMAS. Ya cu ta dificil pa nan competi cu prostitucion ilegal, solamente si nan ta bira ilegal tambe. “Prostitucion ilegal a bira un postema,” un doño di bar na San Nicolas a bisa.

Mientras cu e asociacion aki semper a boga pa cumpli cu tur exigencia di gobierno. Pero e realidad ta mustra nan otro cos: Si antes e trahadonan sexual mester paga 450 florin na e doño di e bar a base di porcentahe pa huur e camber pa siman. Awor e trahando ilegalmente aki ta paga 200 florin maximo pa siman. Mientras cu e prijs pa nan servicio sexual por varia entre 50 florin te cu 150 florin, y tin biaha mas caro.

Un persona a declara na e matutino aki cu e prijs aki ta depende di locual e cliente kier. “E ta manera un auto. Si bo kier core den un auto di luho manera un Mercedes-Benz bo mester paga pe,” el a bisa.