Dialuna, e barco Samuray a sali for di Puerto Nuevo den e region nort di Guajira (Colombia) cu varios ton di diferente producto, specialmente productonan agricola, pa abastece e pueblo di Corsou na bon prijs. Esaki despues cu Venezuela a cera su frontera pa e isla aki. E asunto aki a inicia un discusion na Aruba den tur sector envolvi den e actividad comercial y economico aki.

Segun presidente di fundacion Rancho, Clifford Rosa, e echo cu e barco a bay rumbo Corsou y no Aruba, ta un señal evidente pa nos realisa cu e momento a yega pa Aruba tambe beneficia di e actividad comercial aki. Fundacion Rancho ta encurasha gobierno di Aruba pa cuminsa cu e parti diplomatico pa asina concretisa, pa medio di e firma di un documento, e facilidad pa reactiva e actividad maritimo y comercial entre Aruba y Guajira.

Rosa no ta descarta cu esaki por bira e fundeshi pa cuminsa un era y pilar economico nobo pa pais Aruba. “Aruba tin hopi pa gana den e laso economico cu nos mester cu Guajira,” el a bisa.

Gestion diplomatico
P’esey for di Aruba e echo cu Corsou a logra e posibilidad maritimo y comercial aki cu Guajira a wordo mira cu un sentimento mixto. Puerto Nuevo a habri na Guajira, y e prome barco pa inaugura e waf aki no a sali rumbo pa Aruba, sino pa Corsou.

No tin nada contra ruman isla Corsou, cu a concretisa y haci realidad e proceso comercial. Ya cu Corsou a bira mas dicidido cu Aruba riba e tereno aki, organisando reunionnan cu e grupo empresarial Gran Caribe, cu hunto cu e grupo empresarial Malecon, a logra concretisa varios encuentro cu institucion gremial y autoridadnan di Colombia y Corsou. Aruba a logra haci tur esakinan, te hasta prome cu Corsou, pero te ainda e facilidad di un actividad regular entre Guajira y Aruba no a wordo concretisa.

Rosa, kende pa varios aña ta fungiendo como gestor comercial pa fortalece e relacion bilateral cu a yega di existi pa decadanan entre Guajira y Aruba -y muy specialmente cu e comunidad di Rancho- ta indica cu hopi esfuerso a wordo haci, pero a falta un gestion diplomatico mas efectivo pa reactiva e ruta comercial aki. Unda e ‘bottleneck’ ta?

Segun Rosa, den principio y como fundacion, nan a yega firma un MoU cu Gobernador anterior di Guajira, Wilmer Gonzalez Brito, y tambe cu esun actual, Wilson Rojas, kende tabata co-firmante di e acuerdo di entendimento aki, tempo cu e tabata secretario di e gobernador Gonzalez Brito.

E ta haya cu como fundacion nan a haci nan parti. Pero semper den e trayecto aki tin un parti institucional, caminda gobierno den su totalidad, of e ministerio concerni, por realisa e parti diplomatico. Corsou a sa di logra esaki, caminda diferente biaha nan mandatarionan tabata bishita Guajira.

Rosa ta corda cu na november ultimo nos minister di economia, finansa y cultura a bay den un mision comercial hunto cu Corsou tambe y Hulanda, cu presencia di e mandatario Rutte. E biaha ey, Corsou a probecha pa firma un documento, mientras cu Aruba no a firma nada.

Como fundacion Rancho, nan ta apoya cualkier gobierno cu ta sinta. Pero Rosa ta haya cu e proceso aki, cu ta canando for di varios aña caba, no mester a conoce cambio na momento cu tin cambio di gobierno. E tipo di proceso aki mester wordo evalua bon y mira cu otro wowonan, ya cu si nos comunidad no tin siguridad alimenticio y na prijs accesibel, e ta keda un situacion delicado.