Den nan prome conferencia di prensa despues di eleccion, ex-minister di Enseñansa, Armando Rudy Lampe y ex-parlamentario Ricardo Croes como miembronan di partido RED Democratico a trece algun punto dilanti despues cu nan a perde nan asientonan den ultimo eleccion.

Ricardo Croes a declara cu nan ta bin mirando e ultimo acontecimentonan rond di e isla despues di eleccion, na unda el a sigura cu e dolor di perde, nan ta sintie despues cu nan “a desplega un trabao integro y honesto tanto den ministerio di Educacion como den parlamento”.

Asina mes, el a indica cu nan tambe ta observa e comportamento di gobierno y tambe di parlamento, caminda cu e deseo di nan ta cu no ta basta ken haci cambionan positivo pa e pais aki, sino pa e cambionan tuma luga. “Lastimamente mi a ripara cu no tin niun cambio absoluto pa mehora e pais akinan. Ami no a mira niun desaroyo economico pa e pais aki, desde cu mi persona mes a participa den gobierno nos no a logra lastimamente a base di un boycott tremendo”.

El a trece dilanti e contract cu gobierno a firma cu e compania Eagle LNG, expresando cu ta un contract “dudoso” di cual ministernan nobo perteneciente na partido Raiz no tabata sa mes kico a tuma luga.

Ademas Croes tambe a papia tocante e problematica di SKOA y directiva di otro scolnan. Aumento di schoolgeld den su opinion ta un berguensa ora cu un directiva di scol cu a actua contra ley y tin veredicto di hues riba esaki “tin e curashi di aumenta schoolged. Y mi ta spera cu esaki hamas lo tuma luga”, el a bisa.

Un di e metanan cu Croes tabatin ora el a drenta den parlamento cu partido RED tabata e legalisacion di cannabis medicinal como pilar economico pa Aruba, unda el a señala cu el a haya apoyo y sosten di ministernan di Salud, Dangui Oduber y di Economia, Xiomara Maduro. Pero esey no a tuma luga, mientras e ta kere cu esaki por a duna un entrada di aproximadamente 470 miyon florin pa caha di gobierno.

Di su parti, ex-minister Lampe a papia tocante un carta cu SKOA di dia 03 di maart di e aña aki a manda relaciona cu aumento di schoolgeld. El a sigura cu esey a aumenta 3 biaha mas, loke ta afecta ainda mas e situacion cu Aruba ta aden na e momentonan aki, unda prijsnan ta subiendo.

Den e carta dirigi pa parlamento, Lampe a menciona e manera con ta subsidia e werksternan ta hancra den ley y SKOA kier hacie y “ta bin pidi pa fix algo ilegal politicamente via parlamento”.

“Un MB di un minister no por cambia un ley.” Ademas el a señala cu e rapport di Central Accountantsdienst Aruba (CAD) a mustra cu e MB ey, no tabata e intencion pa bisa cu e werksternan ta bay haya un status di ambtenaar, cu nan ta bay wordo paga conforme subsidio di salario y no manera ley ta prescribi cu ta exploitatiesubsidie.

Den su opinion, Lampe ta bisa cu e carta aki dirigi pa parlamento ta contene un cantidad di foutnan y mentiranan unda cu hues a dicta sentencia dos biaha, na april 2020 y na mei di 2021 cu SKOA ta actuando contra ley.

Den investigacion cu CAD a haci segun Lampe a indica den cual nan a entrevista tur hende, a resulta cu Directie Onderwijs a bisa cu nan no tabatin control di nada, cu nan a firma documentonan sin controla.

Despues el a enfatisa cu tabatin un otro carta di dia 25 di juni 2021 e cual e no tabatin conocemento y cu a ser firma pa prome minister Evelyn Wever-Croes unda tabata bisa cu dia 30 di juni e lo a bay asisti na un reunion cu SKOA pa asina haya un solucion na e problema aki, un reunion a tuma luga manera Lampe a sigura, pero sin su presencia como minister di Enseñansa pa motibo cu e no tabata na haltura di esey y ademas e tabata contra e proposicion aki.

Ora el a wordo trece e punto aki den conseho di minister manera el a expresa, e no a wordo scucha “pasobra eyden e mayorianan ta manda, partido MEP ta manda, nan a tuma e decision, un decision firma pa e representante di minister Glenbert Croes cu tabata minister di Asunto Social e tempo ey”, el a bisa.

Tambe, el a declara cu el a skirbi un carta pa Sr. gobernador Alfonso Boekhoudt hunto cu un conseho huridico cu el a pidi di un hurista pa mustra na Sr. gobernador cu loke prome minister tabata haciendo ta ilegal, “pasobra bo no por duna e werksternan status di ambtenaar”, el a manifesta.

Na aña 2015 tabatin den total 42 full time job pa e werksternan y banda di dje tabatin part time werksternan unda cu despues nan a cuminsa haya otro beneficionan y e gastonan a subi pa 3.7 miyon florin pa aña, despues e cantidad di trahadonan di limpiesa a aumenta na 88.

E conferencia a finalisa comentando cu e ta pone tur documentonan disponibel pa mayornan pa e momento cu SKOA lo dicidi aumenta schoolgeld pa motibo cu e ta considera cu esey ta un abuso y un inhusticia cu no por wordo acepta.