Referente e anuncio di un investigacion di parti di Ministerio Publico pa cu e fundacion di fraccion POR, Minister di Husticia mr. Andin Bikker a cuminsa pa subraya cu e hecho cu Ministerio Publico a cuminsa un investigacion cu ta regarda e fundacion di fraccion di POR, ta demostra un bes mas cu Husticia ta traha sin distincion alguno. E investigacion tin pa cana su caminda y pues e lo no duna comentario riba e caso.
Di otro banda, tumando nota di e noticia aki sr. Bikker a expresa su opinion personal: “Como ser humano un noticia asina ta yena bo cu tristeza, y ta subraya cu e union politico electoral cu POR a resulta di ta uno hopi dificil, caminda cada bes a bin ta tuma nota di sorpresanan sumamente desagradabel.
Dado momento bo ta cansa di cada bes haya sorpresa desagradabel y soporta critica cu no ta relata na bo persona. Mi no ta reconoce mi mes mas den POR.”
Pues el a dicidi pa distancia su mes for di partido POR y a sostene decision di Conseho di Minister pa entrega e retiro di e Gabinete y yama eleccion prematuro.
Parlamentario Maduro
“Awe parlamentario Maduro a wordo sorprendi cu un noticia den prensa cu Ministerio Publico a emiti un publicacion pa prensa den cual ta menciona cu tin un investigacion contra Fraccion di POR, sospechoso den un investigacion na malversacion di fondo”, segun un comunicado di prensa. Parlamentario Maduro ta distancia su mes di POR di inmediato y lo ta independiente den parlamento.
Maduro tambe ta trece dilanti cu e no ta parti di e Fundacion di POR, ni tin autorisacion riba cuenta di banco di e Fundacion. Maduro a informa cu e ta bay sigui traha pa pueblo di Aruba.
