Miembronan di Outbreak Management Team na Hulanda contra medidanan separa pa esnan no-vacuna

(NLTimes) – Varios miembro di Outbreak Management Team na Hulanda ta contra implementacion di medidanan separa pa personanan cu no ta vacuna contra Covid-19, segun nan a bisa NU.nl. Nan yam’e algo polarisante y dificil pa cumpli cune.

Cu infeccionnan aumentando rapidamente, e Gabinete ta spera pa anuncia medidanan nobo riba diamars.

Un encuensta di EenVandaag entre 28mil miembro di su panel di opinion a haya cu 72 porciento di residente Hulandes vacuna kier pa Gabinete impone medidanan specifico riba esnan cu ta scoge pa no vacuna. Esnan no-vacuna ta absolutamente contra esaki, cu 98 porciento bisando no ta restriccionnan specifico pa nan.

“Mi no ta na fabor di esaki en absoluto”, segun microbiologo medico, Jan Kluytmans a bisa. “Ta hopi contra libertad individual.” Medidanan separa tambe ta bay ta un reto pa implementacion y cumplimento. “Mita di esnan no vacuna ta biba plama rond di e pais, dies porciento ta den comunidadnan religioso, y cuarenta porciento ta den ciudadnan grandi. E ora bo mester haci algo na Amsterdam, Rotterdam y Den Haag. Pero con bo ta bay implement’e, y kico bo ta bay logra cu esey?”

Virologo Menno de Jong ta kere cu medidanan diferente ta bay ‘polarisa nos demasiado’.
Diederik Gommers di asociacion di cuido intensivo NVIC a bisa cu e ‘no ta haci distincion’ como un dokter. “Tambe bo mester ta cauteloso pa no pone gruponan contra otro.”
Andreas Voss, profesor di prevencion di infeccion a yam’e un ‘decision dificil’. “Mi ta kere cu un minoria chikito no mester tene sociedad rehen, pero tambe mi ta contra cualkier forma di discriminacion. Mi kier pa tur hende, incluyendo hende cu a dicidi pa no tuma vacuna, pa por participa den sociedad.”

Tur miembro di OMT cu cual NU.nl a papia a bay di acuerdo riba con pa preveni mayor transmision di coronavirus – miho cumplimento cu e restriccionnan cu ya ta na vigor.

“Tene al menos 1.5 meter di distancia y traha for di cas si ta posible. Keda cas si tin sintoma y haci test. Usa codigo QR pa cierto actividadnan riesgoso. Esaki tur ta medidanan cu mi ta kere cu masha tiki a observa”, Kluytmans a bisa. “E virus no ta bay djis desaparece, ni hasta cu vacunacion. E ta bay bira manehable, pero e problema no ta bay desaparece completamente. E virus aki a wordo agrega y sigur ta bay continua duna consecuencia tur aña.”