Miembronan di oposicion ta reacciona: ‘Sra. Khemlani ta un ‘enciclopedia riba pia’ cu ta yuda Parlamentarionan cu nan trabao’

Pa miembronan di oposicion e decision di Prome Minister Evelyn Wever Croes como Minister pa Asuntonan General pa prohibi Sra. Khemlani pa drenta edificio di Parlamento a cay manera un baño di awa friu. Tanto pa Accion21 como AVP, Sra. Liesje Khemlani ta un profesional, un ‘enciclopedia riba pia,’ cu ta yuda e Parlamentarionan cu nan trabao.

Segun dr. Ryçond Santos do Nascimento, e empleado di Parlamento cu mas di 30 aña di experiencia ta yuda cada un Parlamentario cu mester di informacion y tambe ta yuda cu formulacion di preguntanan. Algo cu ta su trabao. “Berdad si ta cu Sra. Khemlani a reacciona riba un post riba Facebook y mesora despues Presidente di Parlamento mr. Edgard Vrolijk a comenta riba e opinion di Sra. Khemlani,” Santos do Nascimento a bisa Bon Dia Aruba. “Con leu por considera esaki algo politico? E ta un ciudadano cu derecho di expresion.”

Segun e Parlamentario di AVP, Liesje Khemlani ta busca tur documento y informacion den archivo di Parlamento ora cu pidie pe, pero cu esaki no por ta mira como un acto politico, pasobra archivo di Parlamento ta publico.

Locual si a keda demostra ta cu Parlamento y particularmente su operacion no ta independiente di Gobierno. Pasobra si Parlamento tabata independiente, ta Presidente di Parlamento mester a actua y suspende Sra. Khemlani. Te ainda, e trahadonan di Parlamento ta cay bao maneho di Prome Minister como Minister Asuntonan General. “Nos trabao como Parlamentario ta inherentemente politico. Si Sra. Khemlani yuda nos, e por mustra algo politico, pero ta su trabao e ta haci,” dr. Santos do Nascimento a enfatisa. “Esaki ta mustra pakico por ehempel e Ombudsman mester ta totalmente independiente. Cu e tipo di maneho asina aki, ta crea un tipo di cultura di miedo cerca ambtenaarnan pa haci nan trabao debido sin e temor cu por mira esaki como uno politico,” tabata e comentario di e Parlamentario di AVP.

Di su banda, Edgard Vrolijk a reacciona bisando cu “Esaki ta un caso cu DHR ta bezig cu investigacion riba Liesje como trahador. No por divulga nada riba esaki.”