Miembronan di Aruba Entertainment Group: “Nos no tin e dicha di por cria nos famia manera mester ta”

Industria di entretenimento por ta un di e sectornan mas afecta pa motibo di ‘social distancing’ cu Covid-19 a trece cune y su efectonan secundario. Manera trahadornan di e sector ta señala, “esaki ta probablemente e sector cu mas haya sla” y cu ta conforma pa musiconan, promotor, DJ, scol di baile, etc.

Aruba Entertainment Group ta un grupo di musico y DJ local cu a uni pa forma un asociacion, na prome luga pa representa nan miembro y sector en general

Ayera mainta, un grupo di personanan den sector entretenimento di Aruba a haci un conferencia di prensa pa mustra nan preocupacion tocante nan situacion economico, cu a wordo afecta pa via di decisionnan implementa pa loke ta trata pandemia di Covid-19.

Albert Vrolijk, vocero y miembro di Aruba Entertainment Group, a splica cu esaki no kiermen cu nan no ta di acuerdo cu e medidanan cu a implementa. Loke nan ta pidi ta pa tene nan na cuenta, cu e pandemia aki cu a causa un crisis di mas di shete luna y nan no sa kico ta bay sigui pasa ni con nan ta bay sigui biba si mester extende e medidanan un tiki mas.

El a señala cu nan kier coopera den tur locual ta pasando, pero tambe ta pidi pa wak den otro banda, cu nan a bin ta cooperando pa shete luna y sin un entrada. “Tin cu compronde cu locual nos kier yega na dje ta pa por sinta hunto y purba di yega na cierto decisionnan caminda cu posiblemente nos por haci e trabou y tambe cumpli cu e protocolnan”, el a specifica.

Ademas, Vrolijk a declara cu locual ta pasando ta cu hopi di nan no tin entrada mas. Nan no ta trahando y nan no por sigui di e manera aki. Nan a trece dilanti cu nan ta pensa cu e industria aki di entretenimento “posiblemente a wordo lubida”, pero ta importante pa nan sa kico lo pasa cu nan. Segun el a sigura “nos no tin e dicha di por cria nos famia manera mester ta tur fin di luna”.

Tambe a destaca cu esaki ta importante pa nan, pa motibo cu nan tambe ta personanan cu ta sin trabou. “Hendenan por imagina y para den nos sapato cu tin tanto luna sin traha y cu ta yegando na e punto cero, cu ta eynan caba y ta cuminsa perde tur locual cu bo a traha p’e durante tanto aña,” Vrolijk a comenta.

Tambe nan a laga sa cu esaki no ta trata di un ‘side job’. Hopi di nan ta biba di dje y nan ta depende di dje y nan a remarca pa hende por compronde nan situacion, ya cu “hopi hende tin e pensamento cu musica ta algo di pasatempo y pa nos e ta un trabou”.

Por a compronde cu algun di nan ta hayando e ayudo denomina FASE. Pero manera a keda conoci, tambe hopi hende a cuminsa haya esaki y ya hopi di nan ta eherciendo nan trabou. Hopi di nan a cuminsa opera, pero “e mundo aki di entretenimento ta e mundo cu mas a wordo afecta, pasobra a nos ta e prome cu a wordo para y nos ta mirando cu nos ta bay ta e ultimo cu lo wordo yama tambe pa bay traha back.”

E grupo aki ta conforma pa aproximadamente 200 musico, entre otro bandanan y den esaki nan a pone como ehemplo cu na Colombia a cuminsa haci concierto. “Nan a bin cu solucionnan y nan ta number 5 di mundo pa loke ta trata casonan positivo di Covid-19. Y asina nos tambe por bin cu solucion”, Vrolijk a manifesta. Na otro paisnan tambe musica tin su protocol, entre otronan tin personanan tocando paden y hendenan sinta pafo, na unda tambe por come y disfruta e presentacion, el a splica.

“E union di nos musiconan no ta un competencia na e momentonan aki cu un otro persona, nos tur sa cu tin hopi hende pafo cu ta pasando duro” Vrolijk a señala.

Nan a insisti cu nan ta dispuesto pa sinta, scucha y coopera, pa motibo cu nan ta kere cu esey ta e miho manera pa nan por compronde otro. Pero tambe “pa nan corda cu e industria aki ta esun cu ta promovi rond di mundo, no solamente Aruba, na unda turistanan ta bin pa e manera con nan ta wordo entreteni”.

El a trece dilanti cu nan a purba di haya contacto cu crisis team, cu ta esunnan cu ta encarga di tuma decisionnan. Tambe cu te ainda nan no a haya un contesta pa un carta cu nan a manda pa Gobierno mas di un luna pasa, den cual nan a ‘switch’ nan sin papia ni informa nan, pa asina por yega na un acuerdo, pa motibo cu Vrolijk a sigura cu nan por cumpli.

.