E siman aki nos a tuma nota di un veredicto di hues na unda na un manera cla y raspa, de facto hues a duna nos rason cu pueblo di Aruba a cumpra un incinerator cu realmente ta un porkeria!
Pa colmo nos a tuma nota di e hecho cu manera un ladron di anochi kier pasa compra di un otro porkeria pa asina drecha e porkeria cu ta kibra y no ta funciona manera mester ta. Segun nos a compronde den e documentonan di e presupuesto supletorio, cu lo wordo trata otro siman dialuna, ta aparece compra di un otro porkeria! Y esaki sin cu raad van advies a duna su opinion al respecto! y pa colmo por medio atrobe “gesjoemel y foefjes” y esaki ta sosode bou nanishi di e minister di integridad, cu e siman aki ta pidi tur hende pa sigui nan compas moral di integridad!
Cu e gobierno aki cueste loke cueste kier sconde e corupcion aki y purba di e normalisa esaki, nos sa caba! E pregunta cardinal ta: Dicon parlamento ta keto? Ta hopi straño y ta hopi obvio tambe cu ora ta toca decision cu ta wordo tuma riba tereno di desperdicio y medio ambiente cu ta perhudicando nos pueblo grandemente, nos Parlamento den su totalidad ta muisstil!
A cera dump, a aumenta e tarifa pa recoge desperdicio, un incinerator cu no ta traha, a habri sluisnan y laga awa sushi drenta nos lama y awor kier cumpra un otro porkeria, y nos parlamento a scoge pa keda keto, pakico, hush-money?
Den varios articulonan anterior nos a mustra riba tur e falta di integridad y corupcion aki, cu e gobierno via nan “spindoctors” kier tapa y awor ta hayando ayudo di un parlamento cu ta parce cu ta complice den henter e asuntonan aki. mientras tambe nos a mustra exactamente e mesun modus operandi di e gobierno anterior. Esta di normalisa e fechorianan aki.
Nos lo sigui guli manda abou y laga gobierno y parlamento abusa di nos pueblo? Ta basta! Ta pueblo so por scapa e pueblo!
