Miembro di UPP Booshi Wever: Desinformacion y manipulacion ta na ordo di dia pa tapa un maneho anti-Arubiano!

Tierra del Sol a wordo bendi atrobe. E biaha aki na e grupo Iberostar. Segun e mesun fuentenan e grupo aki lo a cumpra Tierra del Sol, pero a mara na e compra, construccion di 3 hotel mas aki na Aruba. E biaha aki gobierno no por bay yora cu ta un “deal” di e gobierno anterior y cu nada por ser haci al respecto. Mescos cu nos a bisa den pasado, nos ta keda bisa cu Aruba no tin mas espacio pa mas hotel. Nos lo mester bay importa mas hendenan cu lo bin traha pa un sueldo minimo cu tur e consecuencianan cu esaki lo trece cu ne.

Pronto nos lo bay scucha e “spindokters” di e gabinete aki cuminsa manipula e pueblo cu e mensahe cu mas hotel lo ta hopi beneficioso pa nos pais. Un mensahe igual na e REGALO di e patrimonio di pueblo “SERLIMAR”! Hopi ta esunnan cu ta puntra nan mes, con ta posibel cu un partido politico cu principionan social democrata por presta su mes pa bay di acuerdo cu algo semehante asina. Sinembargo e contesta riba esaki no a tarda mucho pa nos a haya sa.

Den pasado, despues cu mi a tuma nota di e reparticion di e carteranan den e Gabinete di Evelyn Croes, mi a cualifica e ministerionan cu e.o. RAIZ a haya mas bien como un serie di restpakketten. Mi a splica e motibo pakico nos a yega na e conclusion ey.

RAIZ, pa por hustifica na su votadonan e “restpakket” bochornoso cu ela hay’e ta acepta, a opta pa bende su mes como defensor di pueblo. E defensor a haya ta oportuno e ora pa regala patrimonio di pueblo! MEP cu tambe kier hunga populista a guli esaki manda abou, pero si cu un condicion importante y esey ta cu RAIZ mester bay di acuerdo cu construccion di 3 hotel mas riba nos pida baranca! RAIZ cu su lema “nos no ta nan” a haci uso di e tactica cu “nan” a usa semper, esta “aumenta”, silencio absoluto.

No ta mesun partido cu den pasado a busca miles di firma pa impone un moratorio riba mas camber di hotel, y cu te hasta a trece Sam Cole pa subraya e ponencia aki? Pa puestonan di minister a pone sinembargo e principio aki masha lihe un banda y pa convenencia di sobrevivencia di e gobierno a dicidi di basa nan maneho den “CANI MI, PAMI CANI BO”! Sin importa ki consecuencia esaki por tin pa nos pueblo. No ta importa si Aruba bira un isla yena cu beton of yena cu “minimum-loners”. Den Parlamento incluso e miembro di RAIZ a enfatisa cu si esaki ta e caminda, esta di traha mas hotel y trece mas hende di afo, anto e tin di sosode.

Tristo den henter e asunto aki ta, cu Aruba ta birando e Mecca pa labamento di placa. Un desaroyo peligroso cu parce nos tur tin e tendencia pa tuma esaki cu “een korreltje zout”! Den pasado mi a yega di bisa cu e ARUBIANO a ser poni riba e SPEEDWAY2HELL pa motibo di e maneho liberal den e asunto di imigracion. Y awor bou capa di desaroyo positivo, procedencia di e placa sushi no ta wordo debidamente investiga. Esaki lo tin consecuencia directo pa nos pais.

Gobierno, yuda pa un gang di “spindokters”, ta prefera di tapa e berdad cu desinformacion y manipulacion di informacion. Lo bisa cu e labadonan di placa ta e salbadonan di nos pais. Ta p’esey e pueblo Arubano mester habri wowo y mente pa caba cu esaki mas lihe cu ta posibel.