Segun un video di noticiero El Espectador, den un vuelo saliendo for di Aruba a registra un caso di robo prome cu e avion por a aterisa na aeropuerto Alfonso Bonilla Aragon na Cali.
E victima a bira un assistent di vuelo di e aerolinea, kende a reporta cu a horta placa y otro obheto personal for di dje. E hecho a bira conoci na momento cu e avion a drenta den espacio aereo Colombiano, na momento cu capitan di e avion a splica e situacion a traves di e speakernan, anunciando cu na momento di aterisa na Cali, lo mester warda como 30 minuut te cu autoridadnan por captura e sospechoso.
“Capitan di e avion a informa nos cu a comete un robo, algo cu a laga nos tur sorprendi pasobra no solamente mester deal cu hortamento riba bus y caya di Colombia, sino awo tambe den avion,” segun Leandro Gil, un pasahero, a bisa Noticias Caracol.
Den un video saca pa un di e pasaheronan por observa e momento den cual tres agente uniforma di Polis ta cana den e avion pa captura e presunto ladron.
