Diabierna atardi central di polis a wordo informa cu miembro di prensa a wordo maltrata. Esaki a tuma luga den e hanchi banda di Bohemia restaurant na Palm Beach.
E prome informe ta cu un miembro di prensa di fam A. tabata sinta den su auto. Na dado momento un homber desconoci a agredi e miembro di prensa y a sali na careda core bay.
Personanan cu tabata hunto cu a bay su tras pero a perde di bista.
Altocomisario di Polis sr.Arnhem tambe Recherche a presenta na hospital na unda e miembro di prensa a declara kico a sucede.
Altocomisario di Polis sr.Arnhem ta condena e hecho lamentabel aki. “No ta acepta cu un miembro di prensa ta wordo agredi y tampoco ningun otro persona. Violencia nunca ta e solucion, menos contra miembro di prensa,” Arnhem ta condena e acto aki.
E sospechoso un rato pasa a wordo deteni na warda di polis Shaba.
Cuerpo Policial ta haci un apelacion pa esun cu a wak algo of sa algo yama e tiplijn di polis cu ta 11141. Nos ta garantisa bo ta keda anonimo.
Segun informacion cu a circula riba rednan social, aki ta trata di yiu di ex minister Endy Croes cu a agredi Nelson “Speed” Andrade. Familiarnan di e sospechoso en cuestion, Jeandrick Croes, a publica mensahenan di sosten unda nan a expresa cu esaki ta un reaccion na e bullying y acoso cu el a sufri di parti di e miembro di prensa menciona.
E caso ta sigui bao investigacion y Bon Dia Aruba lo trece mas informacion a medida cu esaki keda conoci.
