Den e dianan aki tin hopi inkietud na San Nicolas tocante e bendemento di e Instituto Medico San Nicolas, miho conoci como Imsan. E pueblo di San Nicolas ta totalmente contra e benta di Imsan y e pueblo tin rason.
Pakico bo ta bay bende e Instituto Medico San Nicolas cu ta duna un bon servicio na e pueblo, e no ta draai bon anto, e tin debenan exorbitante?
Pakico e gobierno demisionario aki tin asina pura pa tuma un decision asina impactante pa e pueblo di Aruba y en special pa e pueblo di San Nicolas awor y no laga e decision ey pa e gobierno nobo?
Ta Imsan ta e causa cu e gastonan di A.Z.V. ta asina halto? E Instituto Medico San Nicolas ta e unico Instituto Medico na Aruba fuera di e Dr. Horacio Oduber Hospital cu ta brinda cuido medico avansa. Fuera di esey e ta e unico back up pa e Dr. Horacio Oduber Hospital ora e servicionan di hospital ta cay afo.
As a matter of fact tin cierto operacionnan di H.0.H. cu ta wordo haci na Imsan.
Al la Fin ki probecho lo tin cu e benta di Imsan? E benta di Imsan no ta bay baha gasto ni pa A.Z.V., ni pa e publico. Al contrario e ta bay costa A.Z.V. y e publico hopi mas placa pasobra esun cu ta cumpra Imsan ta bay saca su placa, cu e a paga pa cumpra Imsan, bek di A.Z.V. y e publico riba e ganashi normal cu mester tin pa maneha Imsan.
Pues e bendemento di Imsan no tin ningun pero ningun beneficio ni pa gobierno, ni pa A.Z.V., ni pa Aruba.
