Miembro di Parlamento, Sra. Aquannette A. Gunn, a dirigi un serie di preguntanan na Minister di Salud Publico y Turismo, Sr. Danguillaume Oduber, tocante e situacion actual di Dr. Horacio Oduber Hospital (HOH).
E preguntanan ta enfoca riba e proyecto di expansion y renobacion di HOH cu a inicia na 2014 y cu mester a keda entrega na 2018, pero cu te dia di awe no ta finalisa. E proyecto aki tabata basa riba un plan di exigencia cu expertonan di hospital a traha.
Sra. Gunn a pidi pa Minister Oduber informa Parlamento si el a duna instruccion na Hunta di Supervision di HOH pa laga un partido independiente efectua un investigacion forensico relaciona cu e proyecto di expansion y renobacion di HOH. Ademas, e ta desea di sa si e resultado di e investigacion a determina si mester entrega un keho pa un investigacion penal na Ministerio Publico, pa asina esnan responsabel por ser persigui.
E carta ta menciona tambe e disputa entre e compania di construccion OHL Arellano y SOGA, cu a resulta den e paralisacion di trabou na e proyecto di renobacion di e edificio conoci como e ‘hospital bieu’. Sra. Gunn a pidi pa Minister Oduber informa Parlamento kico ta e suma cu SOGA a paga OHL Arellano na e momento cu ambos partido a dicidi di separa for di otro.
E carta ta conclui cu preguntanan tocante e situacion di posibel fraude na e laboratorio di hospital, si e mandatario a instrui e Hunta di Supervision pa laga un partido independiente efectua un investigacion forensico y si e resultado a determina si mester a entrega un keho pa un investigacion penal na Ministerio Publico, pa asina e posibel involucradonan por ser persigui.
E carta ta subraya e aspecto vital di hospital pa e comunidad y e necesidad pa e proyecto di expansion y renobacion keda finalisa. E ta pidi pa Minister Oduber informa Parlamento con e lo garantisa cu e cuido di e pashentnan ta ser optimalisa durante cu e proyecto di expansion y renobacion no a finalisa ainda.
E preguntanan aki ta representa un intento pa clarifica e situacion actual di e proyecto di expansion y renobacion di HOH y pa busca transparencia den e maneho di e situacion. E empleadonan di HOH y e demas ciudadanonan ta preocupa cu un proyecto cu mester a keda entrega den 4 aña y cu otro aña lo cumpli dos lustro di construccion y ainda no tin fecha pa entrega e proyecto. Nos hospital ta un asunto di bida y morto y nos merece un solucion pronto. Pero en bes di esey, nos ta haya un proyecto cu a sali for di control, cu un presupuesto cu a subi for di 252 miyon florin pa un suma asombroso di alrededor di 400 miyon florin.
