Miembro di hunta directiva di HOH, Gregory Croeze ta reacciona: Falta di koppeling entre IMSAN y HOH por ta peligroso pa e pashent

Den nos edicion anterior, miembro di hunta directiva di HOH, Gregory Croeze a duna informacion tocante e situacion di institucionnan di cuido di salud, HOH y IMSAN, y e necesidad pa samenwerking. Den e relato aki, el a amplia riba e beneficionan di un posible fusion pa baha gasto, y ademas, beneficion cu esaki lo trece pa tur pashent na Aruba.

Gasto
Den entrevista cu Bon Dia Aruba, Dr. Rajnherc, director di IMSAN, a destaca algun motibo pakico un posible fusion no lo baha gasto pa cuido di salud. “Pasobra na Aruba e lo no scapa placa. E idea cu mester haci compra hunto ya no ta alcaso. Tanto HOH como IMSAN a cumpra nan ekiponan medico algun aña pasa caba. IMSAN a cumpra General Electric y HOH a cumpra Phillips. “No por ni cera un acuerdo di servicio pa e ekiponan aki tampoco. E fase ey ta tras di lomba. E ekiponan di tur dos ta asina sofistica cu pa e siguiente 10 añanan no mester cumpra nada nobo. Pues unda e beneficio lo ta pa un fusion,” segun Rajnherc.

Den caso di cumpra remedi hunto, esunnan mas caro ta kimoterapia, e inmunoterapia y algun antibiotica nobo cu ta hopi caro. IMSAN no ta usa nan, ta HOH so ta usa esakinan. Pues no ta haya un mercado mas grandi y ningun beneficio adicional.”

Sinembargo, Croeze a splica cu IMSAN ta cumpra algun cos for di nan, y si nan tabata haci e compras ey hunto, pa volumen lo sali na miho prijs. “AZV ta bisa nan ta kere cu na comienso mester baha 5 miyon florin pa aña na comienso. Esey ta loke nan a yega di bisa. AZV a bisa nos cu nan ta forsando nos pa traha hunto, y cu si acaso nos no traha hunto, nan ta bay purba kita e 5 miyon florin ey for di nos dos [IMSAN y HOH]”, Croeze a bisa. Esaki pasobra den opinion di AZV, door di traha hunto por spaar placa.

Ademas, IMSAN a menciona cu HOH ta cobra nan, por ehemplo pa saco di sanger. “Pero BloedBank ta cobra hospital tambe!” Croeze ta destaca. “Ta un contract cu IMSAN a firma cu si nan mester saco di sanger nan ta cumpra for di Bloedbank. Pero hospital ta cumpra esakinan for di BloedBank.” Croeze ta aclaria cu BloedBank ta un stichting riba su mes.

Pashent
Pa Croeze, lo mas importante ta e pashent. E ta destaca por ehemplo un pashent cu bay IMSAN y ta haya algun remedi, pa despues e haya mas complicacion y ta acerca HOH, no tin nada den sistema di HOH riba ki remedi e pashent a haya. Pero si tabatin fusion, cu tin un solo sistema pa ambos IMSAN y HOH, na momento cu e pashent en cuestion yega HOH nan por djis mira riba su file ki remedi el a haya. “Si bo no ta trahando hunto, no tin un koppeling entre e dos institucion”, cual por resulta peligroso pa pashent.

Tambe Croeze a referi potret cu ta saca na IMSAN, pero despues na HOH ta bolbe saca potret, un critica cu ta circula hopi entre comunidad. “Ban bisa cu un pashent tambe por saca un potret, pasobra tambe tin X-ray na IMSAN, of un CT Scan, bin akinan, akinan ta bisa ‘no, esaki no ta esun cu nos mester, ban saca otro potret’. E experiencia no ta agradable pa e pashent si tin dos instancia cu nan sistema no ta comunica cu otro. Si tabatin un solo sistema, lo por evita esaki pa e pashent.” Anto esaki ta riba locual kier enfoca.