Diaranson den oranan di atardi, Arminda (Liesje) Khemlani a haya un carta sorpresa di prohibicion pa drenta edificio di Parlamento.
Ta trata di e persona cu na momento di reunionnan di Parlamento ta sinta den e parti memey, cu ta atende pa a habri y cera microfon di oradonan y otro aspectonan tecnico di reunionnan. Un persona cu tin hopi aña haciendo e trabao aki bao di diferente gobernacion.
E carta aki no a wordo firma door di Presidente di Parlamento sino door di Prome Minister mr. Evelyn Wever Croes.
Sra. Khemlani a firma di a ricibi e carta aki y a skirbi na banda “bao di protesta”.
E carta ta bisa cu ta informa Sra. Khemlani cu entrante 23 di maart, 2022, e tin un prohibicion pa drenta edificio, instalacion y hasta autonan di Griffie di Staten. E prohibicion aki tin un duracion di seis siman, y ta bis’e tambe cu e prohibicion aki por wordo prolonga cu maximo seis siman.
A inform’e cu e prohibicion di entrada aki ta relaciona cu posibel actonan politico cu el a haci cu ta un conflicto di interes cu su trabaonan como ambtenaar di Griffie di Staten. Na interes di investigacion y vigilancia di integridad y bon funcionamento di Parlamento, e no por haci su trabao temporalmente.
E decision aki a cay como un sorpresa pa tur esnan trahando den Parlamento. Ademas pasobra e motibo menciona como motibo di e prohibicion ta hopi vaag.
