Dia 22 di maart ultimo, Ministerio Publico a duna di conoce mediante un comunicado di prensa cu un miembro di polis, R. Vos, a keda deteni relaciona cu un investigacion penal y no tabata exclui mas detencion na e momentonan ey.

Den esaki, R. Vos ainda ta deteni na KIA (Bewaring) y Ministerio Publico no ta duna mas detaye di kico e ta sospecha y loke a hiba na su detencion.

Na e momentonan aki e ta den voorlopige hechtenis (gevangenhouding) ainda. Ora e yega 86 dia cera, Ministerio Publico por pidi verlenging di otro di 30 dia mas segun e proceso di voorarrest di Codigo Penal di Aruba ta indica y ta cuminsa di siguiente manera:

Ora e persona ta keda deteni y ta wordo hiba na Warda di Polis pa seis ora y presenta dilanti un sub-fiscal na unda e sospechoso su derechonan ta wordo lesa y e ta wordo puntra si kier un abogado. Akinan ta na unda e ta wordo interoga y asina por tuma su declaracion.

Despues di e 6 ora di interogacion, e persona ta wordo informa sea cu si e lo bay cas of e ta keda deteni pendiente di investigacion (inverzekeringstelling).

Si e persona ta wordo informa cu e ta keda deteni, den dos dia cu e ta den inverzekeringstelling e persona mester presenta dilanti un fiscal na unda e fiscal ta evalua e detencion di e sospechoso y e declaracionnan di testigonan y sospechosonan. E proceso ta continua riba evaluacion di e detencion y si tur cos ta bay legalmente, fiscal ta pidi un hues comisario si por tene e sospechoso te maximo 8 dia pa e bienestar di e investigacion.

Despues di 8 dia, e fiscal tin cu pidi formalmente un hues comisario pa prolonga e detencion. E basenan legal pa fiscal pidi hues comisario pa prolonga e detencion despues di dies dia ta:

  1. Na unda e persona tin chens di huy.
  2. E persona tin chens di influencia e testigonan y sospechosonan cu ta parti di e investigacion na unda e ta sospechoso di e caso.
  3. Na unda e persona por comete of continua e mesun actonan penal cu e ta sospecha di dje.

Si su detencion ta wordo prolonga pa 8 dia mas, e persona ta bay bewaring (detencion preventivo) na KIA. Despues e fiscal por pidi 8 di mas pa prolonga e detencion preventivo y despues di esey e fiscal ta pidi detencion (gevangenhouding) cu ta maximo 60 dia.

Fiscal por pidi un prolongacion di gevangenhouding cu 30 dia mas y un di dos prolongacion cu ta 30 dia extra prome cu nan presenta e caso den corte.