Durante su bishita di trabao na Hulanda na unda Prome Minister a toca diferente tema y a dialoga ariba diferente area di relevancia pa Aruba, el a cubri tambe e area di Raad van Staten. Durante e conferencia di prensa dialuna mainta el a menciona e retiro di e representante di Aruba den Raad van Staten, Sra. Milly Schwengle.
Raad van Staten ta e Conseho di Estado di Reino cu ta duna conseho na gobierno Hulandes no solamente ariba tur nan leynan, pero nan ta duna conseho tambe ora ta trata temanan cu tin di haber cu Aruba.
Prome Minister a splica cu Aruba tin un miembro den Raad van Staten, Sra. Milly Schwengle y despues di seis aña Sra. Schwengle a entrega su retiro pa bay haci algo diferente.
El a indica cu aworaki Aruba ta bezig cu e miembro nobo cu lo reemplasa Sra. Schwengle cu lo ta riba agenda di Rijksministerraad (Conseho di Minister di Reino) proximamante.
E persona cu lo reemplasa Sra. Schwengle, el a indica, lo por asumi e cargo aki unabes cu Conseho di Minister di Reino y tambe Rey Willem Alexander duna su aprobacion y despues lo anuncia esaki.
Prome Minister a remarca cu Raad van Staten a duna varios conseho y esunnan mas remarcable tabata esunnan riba e ley di COHO y RAft, e leynan di reino cu Hulanda kier a bin cune despues di pandemia. E mandatario a resalta cu den e consehonan aki por a mira e influencia di tin miembro di Aruba den Raad van Saten “pasobra el a trece pa dilanti e historia di Aruba den un hopi bon manera.”
“Sr. Schwengle a haci un trabao sublime, semper den comunicacion cu gobierno, cu ministernan, e por a hiba nos mensahe caminda cu e mester a hib’e y e mes a desplega un trabao enormemente grandi na Hulanda cu su netwerk y contactonan,” Prome Minister a agrega.
Durante e ronda di pregunta di miembro di prensa, Prome Minister a ricibi e pregunta tocante e procedura pa apunta un candidato pa Raad van Staten. El a splica cu e procedura di apuntamento di un candidato cu ta bay reemplasa Sra. Milly Schwengle ta un procedura hopi confidencial. El a enfatisa cu Rey Willem Alexander tin e ultimo palabra y unabes cu e tuma e decision, e ora nan ta den libertad pa papia di dje.
