Organisacion ambiental Aruba Birdlife Conservation (Abc) a bati alarma siman pasa pidiendo comunidad pa informacion riba un midimento den area di naturalesa na Bubali pa un otro actividad comercial.
Nan a wordo notifica di un proyecto cu lo mester wordo construi banda di e Embassy Suites Hotel & Shopping Mall cual ta awor bao construccion net dilanti hotel Divi Phoenix. Tin midimento cu a start pero ainda ningun nomber di compania of kico exactamente lo bin akinan ta conoci.
Un biaha mas un pida di naturalesa (groen gebied) lo mester wordo destrui pa realisa e proyecto aki segun e organisacion ambiental Aruba Birdlife ta trece dilanti. Nos a pasa Kadaster pa wak kico nos por a haya riba e proyecto aki pero a topa cu nada. For di locual nos a constata di nos investigacion te ainda, ex minister di Infrastructura y awor parlamentario den oposicion Benny Sevinger (AVP) a pusha esaki hunto cu un comerciante anto firma un opcion pa e tereno aki. Pero tur cos a keda riba papel y nada a wordo registra na DIP of Kadaster. Segun nos ta compronde di nos fuentenan, tur cos ta midi caba y ta cla pa pasa pa un notario.
Sinembargo segun Aruba Birdlife, esaki ta un zona berde pues no por construi eyden. Fuera di esey, e ta un di e miho areanan di parhanan riba nos isla segun e organisacion ta enfatisa. Nos a tuma contacto cu minister actual di infrastructura Otmar Oduber (POR) kende a laga sa cu el a pidi e documentonan di e proyecto pa e por revisa nan. Mas cu esaki e no por a bisa mirando cu e mes no tabata tin informacion oficial ainda na su disposicion di e proyecto aki. Pero el a expresa na Bon Dia cu e lo tin esakinan mesora y nos ta pendiente cu e mandatario y tambe lo tuma contacto cu entre otro parlamentario Sevinger pa su reaccion.
‘Warbler Street’
E localidad unda cu e proyecto lo mester wordo construi ta den e area di Bubali Wetlands cual ta un area hopi importante pa parha. Segun Aruba Birdlife, e area ta conoci manera e ‘Warbler Street’ of e ‘Warbler Road’. Aruba Birdlife kier stop e proyecto aki den corte manera cu nan a anuncia siman pasa. Pero nos a compronde cu nan abogado tin algun dificultad lantando un caso pasobra nada ta registra, pues no tin referencia. Den un potret (drone shot) cu e organisacion ambiental a post riba nan pagina di Facebook siman pasa, por mira e area unda a cuminsa caba pa desaroya y generalmente por mira cuanto caba a wordo coba di naturalesa den henter e area aki completo di Bubali pa desaroyo comercial.
Moratorium
E organisacion ambiental ta conoci caba pa a bringa basta caso den corte ultimo tempo pa locual ta desaroyo comercial den area di naturalesa.
Ultimamente nan a haci un apelacion pa bin cu un moratorio urgente pa stop cu construccion di mas hotel, condominiums, desaroyo cu no ta sostenibel y destruccion di naturalesa. “Yuda pa stop e locura. Yuda stop e destruccion di Aruba, haci e pa e muchanan,” nan ta expresa.
Minister Oduber a laga sa siman pasa durante un rueda di prensa relaciona cu Seroe Cristal, cu lo bin mas accion pa locual ta dumpnan ilegal. El a bisa cu hopi biaha e ta tuma e coordinacion pa pone tur hende na mesa hunto (departamentonan di infrastructura/medio ambiente) pasobra hopi biaha bo no tin autoridad pa actua individualmente pa subi un tereno priva pa haci control. Pues awor lo traha mas estrecho cu Cuerpo Policial y Warda nos Costa pa sigura pa trece trankilidad y cu hende ta cumpli cu leynan. El a bisa cu Seroe Cristal por ehempel ta den zona berde y no por tin actividad eynan. El a remarca cu e ta protegi caba anto p’esey e Landsverordening di e ROPV ta asina importante tambe.
Cual manera nos a yega di publica varios biaha, lo por cuminsa percura pa e balans entre desaroyo comercial y proteccion di areanan di naturalesa. Pa organisacion ambiental ABC primordialmente esaki lo nifica un stop di destruccion innecesario di naturalesa y medio ambiente riba nos isla pa no trece consecuencianan sumamente negativo pa nos futuro generacionnan.
