(AP) — Microsoft ayera a reporta un aumento di 9% den ganashi pa kwartaal di januari-maart, mientras aumento den benta di cloud computing a yuda reforsa su plan pa expande su uso di inteligencia artificial.
E compania a reporta un ganashi pa kwartaal di &18.3 biyon, of $2.45 pa accion, surpasando expectativanan di Wall Street pa ganashi di $2.24 pa accion.
E fabricante di software tabatin ganashi di $52.9 biyon den e periodo, su di tres kwartaal fiscal den aumento, un aumento di 7% riba e mesun periodo un aña pasa. Analistanan encuesta pa FactSet tabata spera pa Microsoft reporta ganashi di $51.02 biyon pa e kwartaal.
E kwartaal a marca un empuhe ambicioso di Microsoft pa capitalisa riba su inversion den inteligencia artificial (AI) y un relacion cercano cu e startup OpenAI basa na San Francisco cu e lansamento na februari di un chatbot AI nobo riba su motor di buskeda, Bing.
Microsoft tambe ta integrando hermentnan similar di AI den e productonan di cloud computing y software cu ta bende na negoshi y organisacionnan grandi, maske no ta inmediatamente aparente na ki grado e caracteristicanan di AI tin un rol den benta total.
E negoshi di personal computing di Microsoft, centra riba su software Windows, tabata ampliamente spera di continua un deterioro cu a cuminsa aña pasa debi na incertidumbre economico y caida den demanda. Benta pa kwartaal di e segmento aki a cay 9% na $13.3 biyon, e compania a bisa ayera.
Compensando pa e caida aki tabata un aumento di 16% den entrada for di e segmento di negoshi cloud-based di Microsoft, na $22.1 biyon pa e kwartaal. Entrada tambe a aumenta 11% na $17.5 biyon for di segmento di software di productividad di Microsoft, centra riba su Office suite di productonan pa trabao, manera e-mail.
