Microsoft a confirma diadomingo cu ta den negociacion cu compania Chines, ByteDance pa adkiri e brasa Mericano di su app popular, TikTok y a discuti cu presidente Donald Trump su preocupacion tocante siguridad y censura alrededor di un adkisicion asina.
Den un declaracion, Microsoft a bisa cu e dos compania a duna aviso di nan intencion di explora un acuerdo resultando den Microsoft tumando posesion y operando servicio di TikTok na Merca, Canada, Australia y New Zealand. E compania a bisa cu ta spera cu e negociacionnan aki lo conclui pa dia 15 di september proximo.
Trump a bisa diabierna cu e lo prohibi TikTok na Merca. Trump y CEO Satya Nadella a papia, segun e compania, y Microsoft tabata prepara pa continua explorando e compra di operacion di TikTok na Merca despues di nan combersacion.
“Microsoft completamente ta aprecia e importancia di adresa preocupacion di e presidente. Ta comprometi na adkiri TikTok, suheto na un revision completo di siguridad y proveyendo beneficionan economico adecua na Merca, incluyendo Tesoreria Mericano”, e declaracion di Microsoft a bisa.
Cas Blanco no a duna comentario inmediato.
Anteriormente tabatin reportenan cu Microsoft tabata den combersacionnan avansa pa cumpra e operacion Mericano di TikTok, cual ta un fuente di preocupacion tocante siguridad nacional y censura pa administracion di Trump. Diadomingo, secretario di Estado Mike Pompeo atrobe a trece dilanti advertencia tocante e plataforma di red social. “Por ta nan patronchi di reconocemento di cara. Por ta informacion di nan residencia, nan number di telefon, ken nan ta conecta. Esey ta problemanan cu presidente Trump a laga cla cu nos ta bay resolve”, Pompeo a bisa.
Den su declaracion, Microsoft a bisa cu por invita otro inversionistanan Mericano pa participa a base minoritario den compra di TikTok. Terminonan financiero no a keda revela.
Data di usuario di TikTok ta warda na Merca, cu control estricto pa cu acceso di empleadonan y su inversionistanan di mas grandi ta bin di Merca, e compania a bisa.
Un comite federal ta revisando si Trump por prohibi TikTok na Merca. Su miembronan ta di acuerdo cu TikTok no por keda na Merca den su forma actual pasobra e ta un riesgo di ‘manda informacion di 100 miyon Mericano’ bek na China, segun secretario di Tesoro, Steven Mnuchin.
Mientras speculacion a crece tocante un prohibicion of benta di e plataforma di red social, TikTok a post un video bisando “Nos no tin plan di bay niun caminda.”
Pero e hecho cu doño di TikTok ta Chines a genera preocupacion tocante e potencial pa comparti data di usuarionan cu oficialnan Chines, como tambe censura di videonan critico di gobierno Chines. TikTok ta bisa cu no ta censura videonan ni lo duna gobierno Chines acceso na data Mericano.
E debate tocante TikTok ta paralel na e accion di siguridad Mericano contra companianan Chines, incluyendo proveedornan di telecomunicacion Huawei y ZTE. Administracion di Trump a duna orden pa Merca stop di cumpra ekipo di e proveedornan aki pa usa den rednan Mericano. Trump tambe a purba di dirigi su aliadonan pa no usa Huawei, pa preocupacion cu gobierno Chines tin acceso na su data – cual Huawei ta rechasa.
