e idea di Microsoft pa un ley di privacidad Mericano lo por haci mas facil pa hende proteha nan data.

E vice presidente corporativo y consehero general interino, Julie Brill, a skirbi dialuna cu hende tin derecho di privacidad, mientras nan ta cada bes mas alarma pa e cantidad di data cu gigantenan tecnologico a colecta. E post ta yega casi un aña despues cu e Regulacion di Proteccion General di Data di Union Europeo a drenta na vigor.

Mientras cu tin varios ley estatal pa privacidad di data, no tin legislacion federal – hasta ora varios senador a propone nan propio ley pa proteha bo data.

Gigantenan tecnologico manera Facebook, Google y Apple tambe a pidi pa un ley di privacidad. Den e vision di Microsoft, e ta pidi pa cambia e responsabilidad di proteha bo data for di e persona na e companianan tecnologico.

Mayoria di proteccion di data ta un experiencia ‘opt out’, nificando cu coleccion di data ta e default, y hende mester haya nan settings di privacidad pa paga esaki. Na maart, legisladonan a critica Google tocante con dificil ta pa ‘opt out’ di su programa di track data.

“Esaki ta pone un peso iracional – y imposibel – riba individuonan”, Brill a skirbi. “Privacidad federal fuerte no mester unicamente empodera consumidonan pa controla nan data, tambe mester pone obligacionnan riba e companianan cu ta colecta y uza informacion personal sensitivo.”

Microsoft tin e cifras pa mira con frecuentemente hende ta tuma e stap extra pa proteha nan privacidad. Den e aña desde cu e ley Europeo a drenta na vigor y Microsoft a lansa su PrivacyDashboard, Brill a bisa cu mas di 18 miyon persona a uza e herment aki.

Considerando cu tin mas di 1.5 biyon aparato di Windows, esey ta nifica cu apenas 1 porciento di usuarionan di Microsoft a cambia nan settings di privacidad. Igualmente, tabatin como 2.5 biyon bishita e aña aki na e pagina di Google Accounts, pero apenas como 20 miyon persona a mira nan settings di aviso.

E yamado di Microsoft pa legislacion di privacidad ta pa sigura cu companianan ta esunnan responsabel pa bo privacidad. Brill tambe a nota cu legislacion di privacidad mester por wordo enforsa.

“Manera mi a mira pa mi mes ora mi a sirbi na FTC, leynan actual no ta suficientemente fuerte pa permiti FTC proteha privacidad eficientemente, den e economia digital compleho di awendia”, Brill a bisa.

Na november, e comisionadonan di e agencia a bisa senadornan cu nan no tabatin suficiente recurso pa regula apropiadamente contra abusonan di data.