Recientemente a tuma luga e apertura oficial di e proyecto di cultivo di microalgae. Ta importante pa menciona cu cultivo di Microalgae no ta algo nobo, tin diferente pais grandi rond mundo ya caba cu tipo di planta manera esun na Aruba. E cultivo di microalgae lo pone Aruba riba mapa global banda di paisnan grandi cu proyectonan innovativo y sostenibel.
E proyecto tin diferente fase di cual e prome ta consisti di investigacion, pa asina mira cual tipo di alga lo ta miho pa cultiva na Aruba. For di e investigacion inicial a resulta cu Spirulina lo ta miho. E motibo pa esaki ta pasobra Aruba tin e elementonan esencial pa e cultivo di Spirulina cual ta lo siguiente:
– Aruba su clima ta calor, cu ta faborece crecemento di spirulina
– E temperatura ta constante durante aña
– Aruba su calidad di awa ta halto compara cu otro pais
– Awa di lama tambe ta un opcion, esaki lo reduci gasto
– Y por ultimo, lo captura e CO2 cu refineria ta emiti den atmosfera y introduci’e den awa pa asina alimenta e alganan. E proceso aki lo reduci gasto y emision di CO2 den atmosfera, cu ta miho pa nos medio ambiente.
E di dos fase ta consisti di e desaroyo di un planta di demostracion, test e CO2 di refineria pa produccion di alga y productonan di demostracion pa consumo local. Y por ultimo e fase 3 ta consisti di aumento di e planta, produccion di productonan comercial manera cosmetica, suplemento pa salud y cuminda, mercadeo local y internacional di e productonan produci y finalmente mester percura pa e ta un negoshi comercialmente viabel capaz di apoya investigacion y desaroyo di productonan nobo.
E atardi tabata masha exitoso, mirando cu interes pa e proyecto ta halto, segun un comunicado di gobierno. E diferente discursonan duna tabata consisti di Alvin Koolman – CEO y Managing Director di RdA, sigui pa Raymond Buckley – VP y General Manager di CAR, Ruurd Schoolderman – Strategic Advisor Energy di TNO, Minister Ing. Mike de Meza y pa culmina e discursonan tabata Prome Minister mr. Mike Eman. E partnernan principal den e proyecto ta TNO, cu ta encarga pa ehecuta e investigacionnan necesario pa cultivo di microalgae na Aruba.
