E campaña di vacunacion cu ta tumando luga ta trece cune un ambiente di speransa. E prioridad ta pa salba bida di hende, pero tambe pa comunidad por hiba un bida mas normal y reactiva nos economia. Te diahuebs un total di 25.192 persona a registra y 9.573 persona a haya e vacuna caba.

Sinembargo tin hende den nos comunidad cu ta contra vacuna of nan ta hopi skeptico riba su consecuencianan. Tin hendenan cu tin miedo cu e vacuna aki lo por trece cierto reaccion negativo pa nan curpa. Y mientras cu e vacuna ta boluntario tur hende tin e opcion di tum’e of no.

Pensamento anti vacuna

Micro biologo, Dr. Wilmer Salazar di DVG a bisa cu tin e grupo di hende cu no ta kere den “negativo.” Kiermen e hendenan cu ta kere cu e virus no ta existi, y e vacuna ta un sorto di chip cu ta controla nos sistema di biba.

Nan tin e mentalidad cu e vacuna lo por cambia nos material genetico. Te hasta nan tin e creencia cu e vacuna a wordo elabora pa mata hende mayor di 65 aña pa bin cu un sorto di limpiesa di over poblacion mundial pa no cobra pension. E creencia aki ta bira uno viral via social media.

“E condicion humano ta esun di busca cosnan pa hala atencion. Y tin hende cu ta probecha di dje…,” el a bisa. Dr. Salazar ta respeta tur hende su manera di pensa. Sinembargo e ta kere cu si loke nan ta trece dilanti ta berdad, e no por compronde dicon paisnan manera Merca, Israel, Inglatera, Spaña, y mas paisnan masha avansa cientificamente lo por aplica e vacuna contra Covid.

“E ta algo cu no ta comprendibel. Y ora cu bo ta papia cu nan, ta dificil pa nan cambia nan pensamento,” el a declara na Bon Dia Aruba. Recientemente el a mira un video via YouTube unda ta wordo bisa cu e virus no ta existi. E ta haya cu un cos asina ta ‘absurdo.’

Tin mashin cu ta microscopico electronico unda nan tin e manera pa wak e virus. Ya cu tin cultivo di celnan unda bo por wak con e virus ta reproduci y destrui e celnan, loke nan ta yama efecto psicopatico. Of efecto di daño di celnan di cualkier tipo di tehido di nos organonan di curpa.

P’esey e ta haya cu esnan cu ta papia cu e virus di Covid no ta existi ta produci un ‘tristesa’ cerca dje, ya cu nan ta kere mesora den cualkier cos. Logicamente e ta reconoce cu mundo ta asina, y no tin un solo pensamento.

Vacunacion masivo

Pero esun cu no ta vacuna tin un riesgo pa nan propio salud y bida. E meta tras di e campaña di vacunacion aki ta pa e bira uno masivo. E idea ta pa crea loke ta wordo yama ‘herd immunity.’

Dr. Salazar a splica cu entre mas hende ta wordo vacuna menos chens e virus tin pa infecta mas hende den comunidad. “E ta perde su capacidad di virulencia” el a bisa. Kiermen e virus ta perde su forsa pa produci un malesa y e virus lo por bira despues di un tempo, menos agresivo y dañino. E ta bira por ehempel como un influenza caminda ta necesario vacuna of e vacuna por caba cune.

P’esey e ta remarca cu ta importante alcansa e nivel mas halto di vacunacion di un poblacion. E ta haya cu Aruba tin e posibilidad aki, ya cu nos tin un poblacion di 125 mil habitante. E ta un poblacion masha chikito compara cu otro paisnan manera Merca, unda nan ta aplica pa dia casi 2 miyon di dosis. Na Aruba 200 mil dosis ta suficiente pa nos por evita cu e virus por lo por infecta esnan mas vulnerabel di comunidad. Si minimo un 70% pa 80% di nos poblacion ta haya e vacuna, e tin un garantia mas halto cu e virus no lo sigui plama y nos hospital lo ta menos bao presion.

Confiansa

Pero como profesional micro biologo, Dr. Salazar a trece mas confiansa riba aplicacion di e vacuna, ya cu e manera con e vacuna ta traha e no ta afecta niun organo vital di curpa.

Segun Dr. Salazar e vacuna no ta afecta por ehempel curason, higra y riñon. E vacuna no tin di haci nada cu e organonan aki, solamente e vacuna ta produci anti curpa contra e virus si e ta drenta curpa, ya cu esey ta su funcion.

E no tin di haber tampoco cu e hende su edad, si e lo resulta no faborabel pe. Solamente cu pa motibo di e hende su edad logicamente su porcentahe di produccion di anti curpa of defensa ta menos.

El a bisa cu un persona mayor cu 90 aña y te hasta cu cierto problema di salud, por wordo vacuna sin problema. Naturalmente den e caso aki mester ta realistico -segun Dr. Salazar- cu e vacuna manera esun di Pfizer no ta bay alcansa un 95% di proteccion, sino cu e lo bira menos. Pero alomenos e hende mayor di edad tin algo den su sistema immuun pa defende si nan ta wordo contagia cu coronavirus.

E tipo di vacuna aki no ta afecta e ADN of material genetico di ser humano ta trece mas siguridad y trankilidad ainda. Dr. Salazar a bisa cu esaki ta nifica cu no causa niun modificacion, mal formacion of alteracion den e nucleo of kern di e celnan.

Tin virus cu ta produci cancer manera e virus di Papiloma Humano (HPV). E virus aki tin interaccion cu e kern di e celnan of epitelio caminda e ta cambia tur structura di e kern. E ta mal forma y e ta reproduci di un forma abnormal cu e resultado final di un desorganisacion den nos organismo, y sin niun forma di control den nos curpa. Pues e ta e tipo di virus cu ta produci cancer.

Dr. Salazar a bisa cu e vacuna aki no tin nada di haber cu e kern di e celnan. Simplemente e ta drenta y e ta bay pa e mitocondria (mitochondria), unda e proteina ta wordo produci. E vacuna cu ta uza e ARNm (mensahero) e celnan ta capta e ARNm. Nan ta actua como mensahero pa genera e proteina y despues nan ta presente na e sistema inmunologico. E ta duna e informacion gewoon y despues e ta auto destrui. “E ta destrui totalmente su so. E no ta keda ni resto di e ARN di transferencia (ARNm).”

A pesar di aplicacion y proteccion di e vacuna contra Covid, Dr. Salazar a bisa cu nos mester sigui uza tur medida di proteccion, te ora nos comunidad por alcansa un porcentahe basta grandi di proteccion. No solamente local, sino cu nos mester tene cuenta cu nos region tambe.

Igualmente nos comunidad mester realisa – segun Dr. Salazar – cu aworaki tin un oportunidad pa “acaba e tipo di virus aki. Ban proteha y vacuna boso tur.”