Michelle Lont ta un trahado social na Stichting Hunto den e departamento intramural y nazorg. Den un entrevista cu Bon Dia Aruba e ta conta di su trabao, con el a namora di loke e ta haci y su conseho como profesional pa crea conscientisacion ariba e tema di adiccion.

Michelle a studia como trahado social na Universidad di Aruba y a gradua na 2020. Despues di traha un tempo na DVG, el a bay back den e parti di adiccion, mirando cu tempo el a haci stage, tempo e tabata studiante den cuido di adiccion, el a haya un pasion pa e grupo ki y aworaki ya e ta bay cumpli dos aña trahando na Stichting Hunto

E ta traha den e departamento di intramural y nazorg. Intramural, el a splica, ta e parti di rehabilitacion ora cu clientenan ta yega e fundacion pasobra ya nan mester di ayudo y nan no por haci cuido ambulante mas. Dus nan ta cera nan mes pa un periodo di tempo. Despues cu nan sali di rehabilitacion e ta sigui cuida nan y esaki ta e di cuido di nazorg.

Michelle ta conta cu su trabao ta uno dinamico y esey ta algo cu e ta haya hopi placer den dje. No tur dia ta mesun cos, el a bisa. Un dia e por haci bishita na cas di un persona cu ta bao di cuido ainda, un dia e ta cu e clientenan mes den Sero Colorado dunando les, papiando cu nan den sesion. Tambe e por ta papiando cu e famia di un cliente pasobra ora un persona tin un adiccion of tin problema di salud mental, no ta cu e cliente so e ta traha, “bo ta traha cu full e sistema, mi ta traha cu e cliente su famia.”

Apart di esey e ta den meetings constantemente mirando cu Stichting Hunto ta un stichting relativamente nobo, nan a caba di uni cu SPD y FMAA, pues nan ta den constante “trial and error” pa wak kico por wordo implementa. “No ta tur dia ta mesun cos pero e bunita ta cu tur dia tin algo productivo tras di dje,” Michelle a remarca.

Pa loke ta cifranan di adiccion, si tin aumento o no den esaki, el a indica cu datos ta mustra cu nan ta hayando hendenan hopi mas jong ta drentando un centro di rehabilitacion. Hobennan di entre 23 pa 29 aña ta e grupo mas jong y compara cu añanan atras, el a remarca, no tabatin edadnan asina jong ta bin busca rehabilitacion.

Awendia mayornan ta drenta pa busca rehabilitacion y esaki ta duna indicacion cu e uso entre hobennan ta mas halto cu consecuencia cu e ora e hobennan aki tin mester di ayudo na un edad mas trempan.

“Locual nos ta boga pe ta hopi prevencion. Pesey nos ta traha hunto cu FADA y otro stichting pa nos por crea consciencia entre nos hoben cu e uso di cualkier substancia no ta cuminsa solamente na e substancia, e ta cuminsa na e factor ambiental, e ta cuminsa na bo famia, den bo seno, cu ken bo ta cana,” Michelle a enfatisa.

Como profesional y como stichting, Michelle ta splica nan ta boga hopi tambe pa trece informacion corecto pa e hobennan pa asina cuminsa di trempan pa evita cu aki par di aña e casonan ta sigui aumenta.

Pa loke ta factornan cu por conduci un persona na consumi cualkier tipo di substancia y bira adicto na esaki, Michelle a categorisa tres punto. Prome factor ta cu un persona ya ta nace cu un problema mental cu por hib’e mas lihe na cay adicto na un substancia. Di dos factor ta e historia di famia of e ambiente cu el a crece unda cu el a wak cu e ta algo normal of cu e ta hereditario. Di tres tin e factor social pasobra hopi biaha e hobennan ta cuminsa consumi pasobra e ta algo master, e ta algo trendy, amigonan ta hacie y e tambe ta hacie, peer pressure. Tambe tin trauma, tin hende ta pasa den trauma asina severo cu e unico cos cu nan por haci pa tapa e dolor ta cu adiccion.

Den pasado e tema di adiccion tabata ser considera un tabu grandi y hopi hende no tabata gusta papia di e tema, Michelle ta splica cu pa loke ta e aspecto aki COVID a bin pa siña cu salud mental no ta discrimina niun hende.

“Mi ta kere COVID a bini y a laga esaki hopi duidelijk, salud mental ta algo cu nos tin cu atende cune. Mi ta kere desde COVID pa aworaki e enfoke pa salud mental a aumenta drasticamente. Pero a pesar di esaki ainda e ta keda un tabu, ainda tin hende tin miedo of no sa unda pa cerca, pero tiki tiki nos ta creando consciencia,” el a subraya.

El a recorda cu e luna aki mes ta un luna pa crea consciencia pasobra ta luna di salud mental y esey kiermen cu como profesional trahando den e veld e trabao pa e luna aki ta conscientisa hende cu ta okay cu pa no ta okay un dia, cu ta bon pa busca ayudo y cu tin hende cla pa yuda. .

“Mi ta kere cu tiki tiki nos ta kibrando e stigma, nos ta kibrando e tabu pero mi ta kere nos tin un caminda largo ainda pa cana, pero esaki ta locual nos tin cu haci,” el a agrega.

El a enfatisa: “Como dunador di cuido nos no mester tin miedo di ta vulnerable. Como dunador di cuido tambe ta okay pa nos bisa mi tambe ta cansa, mi tambe mester di ayudo y mi ta kere ora personanan wak cu nos como profesional ta bisa mi tambe mester di ayudo, esey tambe ta habri e porta. Mi ta kere si nos ta vulnerable, nos cliente por siña di esey tambe.”

Por ultimo, Michelle ta bisa, specialmente na e mayornan, pa nan ta hopi mas consciente di nan yiu, kico nan ta haciendo, kico nan ta sintiendo y no pa solamente controla kico nan ta haciendo, si no mas bien pa bisa cu como mayor nan tey pa nan yiu. “Ami ta kere esey ta loke hobennan di awendia ta falta, cu nos por bisa nos t’ey pa bo.”

Tambe na tur docente y hendenan rond di e hobennan, el a remarca pa nan na ta e positivismo cu e hobennan tin mester pa asina nan tambe por sigui bay dilanti.

Pa finalisa, su mensahe pa e hobennan di Aruba: “Si bo ta sinti cu bo tin cualkier problema, dolor y bo ta sinti cu no tin niun hende pa bo of cu no tin niun porta habri pa bo, sa cu tin personanan cu ta dispuesto pa scucha bo, cla pa yuda bo. Mi ta bisa nan durf di bin busca ayudo y mi ta bisa nan semper tin un solucion, semper tin un miho alternativa. Tin biaha ta mustra cu no tin salida, semper busca algo positivo aunke e situacion ta scur.”