Diasabra ultimo, Corte di Husticia di Aruba a habri su portanan cu un opendag pa comunidad caminda diferente organisacion y fundacion tabata presente pa duna informacion, den e caso aki, Michella Steenvoorde-Laclé presidente di Comision di Plan di Mayor Aruba a splica cu nan a haya hopi bishita ya cu nan ta traha den liñanan estrecho cu Corte.

Ora mayornan ta bibando un divorcio, nan no ta yega na otro of no tin un plan di mayor cla, e ora un hues ta referi nan na Plan di Mayor unda por medio di griffier nan ta haya un e-mail y asina nan ta tuma contacto cu e mayornan pa nan inscribi oficialmente cerca nan y e ora ey e proceso cuminsa.

Steenvoorde-Laclé a sigura cu for di algun tempo nan tabata bin luchando pa bin cu e ley di Plan di Mayor e cual a drenta na vigor for 1 maart 2024. E ley aki ta encera cu mayornan cu tin mucha menor di edad y ta bay separa of divorcia tin e obligacion, pa ley, pa traha un plan di mayor.

Den e plan aki, nan ta bay divulga precies con nan ta bay reparti e responsabilidadnan pa cu e yiunan, den esaki, tin e tema di alimentacion, gezag overblijf, pero tambe por ta trata cu un di e mayornan tin un pareha nobo y no por deal cu esey of con por comunica cu otro, na unda e mucha ta bay despues di busk’e for di scol, tur e detayenan ey te cu vakantie.

“Pero tin biaha e mayornan ta den un conflicto, anto door di e conflicto nan no ta yega na comunica cu otro pa traha un plan di mayor, dus na MFA Santa Cruz ta ofrece un family mediation cu ta un proyecto di seis siman of un cu ta yama Ouderschap Blijft y esey ta dura maximo nuebe luna,” Steenvoorde-Laclé a señala.

Den e trayecto aki, nan ta papia cu e mayornan y duna nan ehercicionan, traha cu nan pa reestablece nan comunicacion pa nan por funciona na un nivel di parent rol, “lagando afo nan rol di pareha, pasobra esey no ta existi mas, pero semper bo ta keda mayor.”

Durante e proceso aki, nan ta ofrece nan pa specialistanan papia cu e mucha pa motibo cu den e ley ta stipula cu e mayornan mester bisa e hues con nan a involucra nan yiunan den e diseño di e plan di mayor, esaki ta skirbi den e Internationale Verdragen van het Kind, articulo 12 cu e mucha tin derecho di wordo scucha.

Nan tin un documento cu ta yama Plan di Mucha of Plan di Hoben y den futuro tambe lo tin Plan di Kleuter, segun el a sigura, den esaki nan ta papia cu e muchanan riba nan nivel, ta splica nan loke ta nan derechonan, unda por ehemplo den articulo 3 ta bisa cu adulto mester tuma decision cu ta lo miho pa e yiu, of articulo 10 unda ta indica cu si un di e mayor ta biba na otro luga, e yiu tin cu bishita tur mayor y bay cerca nan of articulo 9 cu ta bisa cu e yiu tin derecho di tin contacto regular cu ambos mayor.

Di e forma aki, nan ta siña e muchanan e articulonan cu tin di haber cu proceso di separacion y nan ta traha e plan di mucha unda. E muchanan lo splica con nan ta sinti nan mes, na unda nan kier biba, con nan kier bay di mami pa papi, “e ta depende di e mucha su deseonan, ora e mucha ta traha su plan, e ta firme y nos ta present’e na e mayornan,” Steenvoorde-Laclé a informa.

Di e forma aki, e mayornan por tuma na cuenta e deseonan di nan yiu ora ta haci e plan di mayor.

Un bes cu e dos documento aki ta cla, nan ta ser entrega na Corte di Husticia y nan ta haya nan balor ehecutorial e ora ey.

Esaki ta algo cu ya caba a cuminsa y for di maart cu nan a habri na MFA Santa Cruz nan ta conoce 84 caso cu nan ta intermedia.

“Tin casonan ta hopi [dificil], unda cu nan ta dura mas cu otro, tin biaha tin di haber cu nan no ta bon informa, bo ta haya mayor cu mester di mas guia. E ora ey nan mester bin na 6 sesion y preguntanan di separacion of divorcio mas intensivo unda mayornan mester tuma nan tempo pa papia, comunica y splica pakico nan ta rabia cu otro, kico ta e rabia y purba pone nan separa di kico ta e problema di pareha y kico ta e problema di mayor, pa tema di mayor nan tin cu deal cu otro back, problema di pareha bo tin cu deal cu bo mes y no involucra e muchanan den esaki,” Steenvoorde-Laclé a bisa.

Ademas, el a informa cu siman pasa Plan di Mayor tabatin e oportunidad di duna un presentacion na mayornan di alumnonan di Pius x School, nan a duna informacion tocante e servicionan di Plan di Mayor Aruba y tambe a splica detayadamente tocante e programa di KIES (Kinderen in een Scheiding). Actualmente Pius X School tin 2 Kies Coaches y ta den proceso pa cuminsa cu e programa di KIES e cual ta un programa unda e muchanan ta siña maneha nan mesun proceso door di comparti nan mesun experiencia, pensamento y emocion cu Kies Coaches y otro muchanan.