Imeldahof lo tene nan evento anual pa seis aña ‘Zumbathon’, cu ta pa recauda fondo pa nan localidad y pa sostene e muchanan di Aruba. E evento ta awe nochi cuminsando 6:30 pm.
Joanne Maduro, begeleider di Imeldahof a duna di conoce cu e Zumbathon lo tuma luga na e plenchi di Volleyball. Nan meta ta pa recauda fondo pa sigui traha cu e muchanan.
Nan ta conta cu yudansa di varios persona y for di New York, entre nan Michael Goldstein, kende ta persona cu a bin cu idea pa cuminsa cu e actividad aki. Goldstein ta splica cu e tin 14 aña biniendo Aruba. “Ami cu famia ta sinti nos mes na cas.”
Goldstein ta comparti cu el a bin cu idea 6 aña pasa pa asina recauda fondo pa Imelda Hof por sigui sostene e muchanan. “Ami cu mi famia a bin pa yuda, nos ta train e muchanan pa haci cosnan cu otro, haci wega, lesa buki.”
Pa e motibo aki nan a wak e necesidad pa un actividad asina y dicidi pa tuma iniciativa pa ‘laga henter e isla sa cu nos ta existi’ y por gana placa pa e fundacion. El a bisa cu e prome biaha cu a organisa 50 persona so a bin, pa aña pasa nan a conta cu 125 hende.
Goldstein ta bisa pa hende bin pa aporta y yuda pa informacion yega mas leu. E tin experiencia den organisa evento asina na New York y rond di otro pais cu el a bishita, tambe a haya cu Aruba mester e yudansa.
El a expresa cu e ta wak cu na Aruba, e muchanan di Imeldahof ta mas grandi di edad. “Ta parce cu hende no ta interesa den mucha grandi.” E ta compronde cu ta mas dificil pa tuma un mucha grandi, pero toch ta keda importante pa duna sosten.
Persona cu participa lo por baila conhuntamente cu e muchanan y ta un manera pa mantene tur hende activo. Nan ta contento cu diferente sponsor cu a aporta pa e actividad bira posibel.
Nan ta conta cu diferente instructor local y internacional. Pa mas informacion por check riba pagina di Facebook di Imeldahof. Tambe a bisa cu lo tin diferente premio pa persona cu participa.
Locual e ta bisa cu ta importante ta pa hende por baila y e muchanan sinti bon y contento. “E ta bon pa hende sa cu Imeldahof ta existi, pa nan por duna sosten. Ta invita pueblo di Aruba pa atende, diberti y yuda e muchanan local cu mester di e ayudo.”
