(AP) — Pa di tres aña consecutivo, Miami Beach ta haya su mes confrontando violencia di spring break, incluyendo dos tiramento fatal y multitudnan descontrola, a pesar di presencia masivo di polis y actividadnan designa pa duna hende alternativanan pa bebe alcohol y cana riba caya.
E energia di “fiesta henter e rato” den seccion South Beach di e ciudad popular ya a conduci oficialnan na prohibi benta di alcohol na clubnan mas grandi despues di 2am. Polis ta staciona tur caminda, incluyendo den torennan mobil cu ta duna oficialnan un bista riba caya. Arte, musica, yoga y torneonan di volleyball a keda agrega e aña aki pa duna hende algo di haci, al menos durante dia.
Asina mes e violencia y caos riba caya ta continua anochi. Henter anochi.
E ciudad a impone un toque de queda cu a termina ayera mainta, pero a dicidi na un reunion di Comision di Ciudad pa no impone otro toque de queda e siguiente weekend, tempo cu e Ultra Music Festival ta bay atrae miles di hende na South Beach. Ta e di tres weekend di spring break unda e pio caos ta sucede.
Polis di Miami Beach a reporta al menos 322 aresto riba un variedad di cargo entre 27 di februari y diadomingo. Comisionadonan di e ciudad a bisa cu a confisca mas di 70 arma di candela den e tempo aki. Esaki ta sucediendo a pesar cu polis ta trahando den shift di 14 ora seis dia pa siman, segun un declaracion di emergencia di e ciudad. E tiramento mas recien a sucede pa 3:30am diadomingo riba Ocean Drive na South Beach, segun polis. A tira un homber ken despues a fayece na hospital, y agentenan a persigui un sospechoso riba pia. No a revela e identidadnan.
Diabierna nochi, un victima masculino a ser mata y otro herida seriamente den un tiramento cu a plama multitudnan den panico. Polis a detene un persona na e escena y a haya cuatro arma di candela, pero ainda no a duna mas detaye.
Pa algun comerciante, e multitud ta imposible pa controla. Vice-alcalde Steven Meiner a bisa cu ta bay tin debate den proximo luna riba con pa prepara miho pa proximo spring break.
