-300x199.jpg)
Michelle de Groot a asumi e responsabilidad di ta directora di Atia. El a bisa cu Atia su rol como gremio no solamente ta esun di ta bos di comercio sino cu nan ta purba di informa nan miembronan di e desaroyo cu ta tumando luga den nos pais.
E aña aki cu ta uno di eleccion, como directora di Atia e kier trece dilanti kico ta e vision di cada partido, specialmente riba tereno economico. E ta un punto importante pa Atia e aña aki; y pa yega na esaki nan ta pensando townhall meetings, etc.. Pero tambe mescos cu Atia a yega di organisa aña pasa un seccion di informacion cu Banco Central, nan kier envolve mas partnernan pa bin cu informacion concreto cerca nan miembronan.
Atia tin alrededor di 170 miembro di diferente sector grandi di Aruba, y cada miembro ta representa un gran cantidad di empresa di nan sector, pa ehempel nan tin Ahata, sector di construccion, telecomunicacion, bancario, etc… Den nan board nan ta representa no solamente miembro directo, pero tambe dor di nan miembro nan ta representa un gran cantidad di sectornan/gremionan. Nan ta representa un 80% di e sector comercial na Aruba.
Como directora di Atia, de Groot su vision ta esun di “trece balor na nan miembronan”. Ya sea dor di lobby pa nan, pero tambe brindando educacion den nan areanan di trabou. P’esey e ta urgi e comerciantenan pa bira miembro di Atia pa asina nan por beneficia di loke nan ta ofrece. Nan ta trahando aworaki nan plan pa 2017 y pronto nan lo anuncia esaki.
