Ayera e pueblo Venezolano a cuminsa move masivamente contra e gobierno Chavista di president Nicolas Maduro pa condena e decision pa no celebra un referendum revocatorio contra dje. Mientras cu awe e cumbre Iberoamericano cu a cuminsa na Cartagena, Colombia, cu presencia di 14 mandatario y hefe di estado, lo trata entre otro e tema di e crisis institucional na Venezuela.
Na Aruba Laura Luces kende ta un di e lidernan di oposicion contra e gobierno Chavista fei nos isla, ta mira cada dia e situacion mas dificil pa su pais Venezuela. “Ya cu e dictador no kier sali cu voto. Mi tin miedo infinito cu nan lo masacra e pueblo Venezolano”, el a bisa. Ya caba ta wordo papia di hendenan herida y mortonan na Tachira; y tambe cantidad di hendenan deteni.
E ta haya cu e pueblo di Venezuela ta desea un cambio pacifico, sin sacrificio di bida humano y di un forma legal tanto constitucional y democraticamente. Pero e gobierno Chavista sa cu nan no ta mayoria mas, y nan no kier sali democraticamente. “Semper cu nos ta sali, nan ta organisa un contra marcha”, el a bisa.
Cada bes e tipo di accion aki caminda miles di hendenan ta protesta, ta refleha cu e pueblo di Venezuela ta desaproba e gobierno di Maduro, segun Sra. Luces. Ainda e no sa si na Aruba nan lo expresa nan solidaridad cu e marchanan cu ta tumando luga na Venezuela.
El a denuncia cu den hopi ciudad na Venezuela e “colectivo” y hendenan violento a cuminsa haci presencia den e marchanan organisa pa oposicion pa ataca nan. E no ta haya cu e pueblo di Venezuela ta merece un trato asina, ya cu nan a sali pa protesta den “forma pacifico pero contundente”. E manifestacion aki –segun Sra. Luces- no kier wal mas e regimen comunista y dictatorial di Maduro y su combo. “Ya ta ora pa nan bay…” El a bisa cu 17 aña di e gobierno Chavista tabata suficiente pa destrui su pais, y tur loke nan mester horta, nan a horta nan caba.
E accion masivo cu a tuma luga ayera, y otro mas grandi programa pa diahuebs otro siman den henter teritorio Venezolano, e ta mire como un señal mas cu e pueblo di Venezuela den su mayoria no ta aproba e maneho di presidente Maduro.
