Durante un presentacion di Delano Punit di Hydroponic Suriname el a splica con el a cuminsa planta fruta y berdura haciendo uzo di e sistema di Hydroponic y pakico e ta kere cu e ta algo facil cu tur hende por haci. Hydroponic ta un manera inovativo di planta, unda cu bo no mester mes grandi, bo ta spaar awa, chens chikito pa problema cu bestia, abo tin control riba crecemento di bo matanan y ta costa menos tempo den diferente sentido.
Sr. Punit a cuminsa ta splica cu agricultura ta algo cu e no tabatin den dje, sinembargo ya e tin 10 aña cu e ta bezig cu Hydroponic, cual el a cuminsa prome como hobby. Sr. Punit ta splica esaki pasobra e ta kere cu tur hende lo por cuminsa cun’e y no ta pasobra nunca bo planta un simiya, kiermen cu bo lo no por hacie. “E manera di planta aki no ta nobo pero e ta inovativo como cu bo no mester planta den suela y e idea ta splicabo con bo mes por cuminsa cu algo asina patras den bo cura di cas.”
“El a mustra potret di su produccion di lechuga, cual ta loke el a cuminsa cun’e. “Bo por cuminsa planta un cos, pero di bo mes bo ta cuminsa planta diferente otro cos ora bo ta mas comodo.” Regularmente Sr. Punit ta duna presentacion y “rondleiding” na studiantenan cu tin interes den esaki pasobra bo tin hopi hoben cu ta interesa pa planta e forma aki. El a splica cu e tin acuerdo tambe cu organsacionnan internacional unda cu ta promociona y haya sa di productonan nobo y tambe nan ta conta cu sosten di companianan local. Sr. Punit mes ta encarga su mes pa duna training di e ramo aki, cual ta locaul el a bin haci siman pasa na Aruba pa un grupo di Fantastic Gardens. Tur cu e meta pa promove e forma di agricultura aki como hobby of pa un futuro empresa.
Cuminsa bo mes
Hydroponic ta plantamento haciendo uzo di awa, (pues no e tera). Den e awa tin alimento/nutriente desolve cu normal lo a bay den tera tambe, djis den otro consistencia. Locual cu Sr. Punis ta recomenda pa cuminsa cun’e ora tin simiya, ta “oasis” e material manera foam cu ta wordo poni den bouqet di flor. Den esaki e ta bora y pone simiya como cu e retene net e cantidad suficiente di awa cu e simiya mester.
Den e awa cu nutriente pa e mata menciona anterior, tin nitrogen, fosfaat, fosforus, calcium, magnesium etc. E ta un alimento balansa, pues unabes bo sa ki bo ta bay planta, bo por cumpra esaki na pidi pa basha den e awa. Por ehempel si ta tomati bo kier planta, bo ta cumpra e alimento pa tomati, Diferente cu si bo plante den tera, ta uza mest cu bo no sa exactamente kico tur ta hinca den dje. Y plantando den sistema di Hydroponic si bo por percura cu e mata ta haya cantidad di nutriente necesario. E hecho cu e mata no ta den tera, tambe ta haci cu e tin chens mas chikito pa haya un malesa di mata, y depende unda bo pone y con bo tape e ta wordo proteha contra diferente insectonan.
Produccion 100%
“Pakico e produccion ta 100%, pasobra e nutriente di e berdura of fruta ta completamente balansa y bo por midi esaki pa controla si e cantidad di nutriente ta corecto of no.” Sr. Punit ta haci uzo di un “EC meter” pa midi e concentracion di esaki, e concentracion ta diferente pa cada mata. Por ehempel berduranan cu ta blach di mata, tin mester di menos alimento cu matanan cu mester traha e berdura of cu tin flor. “Awendia tin internet cu tur e informacion di e cantidad necesario pa cada mata si un persona mester di e informacion aki.” E awa aki ta wordo cambia cada 14 dia.
Beneficionan
Banda di e beneficionan di Hydroponic compara cu planta den tera ariba menciona, mester tin e aspecto cu no mester tanto tereno pa planta e matanan, mirando cu tin un sistema di transferi simiya, mata mediano y mata mas grandi, cu ta percura cu ta haci maximo uzo di un espacio chikito y tambe door cu e matanan no ta den tera, por move esakinan mas facil pa traha luga pa otro. E sistema cu e awa ta circula constantemente ta haci cu matanan ta keda hidrata sin cu e awa ta bay perdi den tera, seca of evapora mesun lihe cu den tera. Ora muha mata den tera mester constantemente tene cuenta cu “onkruid” cu ta crece y pa ranca esakinan, cu Hydroponic esaki no ta un problema mas. Finalmente door cu abo ta duna bo mata e nutriente/alimento cu e mester bo por experimenta y traha mata a base di cantidad di nutriente unico.
