Investigacion di sexual harassment ta continua
E investigacion di sexual harassment na pia di trabou y den educacion na Aruba y Corsou ta continua.
E investigacion ta den man di Karin Bosman kende ta e fundado di About Workplace Harassment (AWH). E lo bin cu e resultadonan nobo medio 2018. E prome investigacion di dje a mustra cu 37% di e populacion laboral di Aruba (16.000 hende) ta sufri di molester sexual (sexual harrassment) frecuentemente na trabou. Na Corsou 1 tercer parti di e populacion laboral na Corsou ta sufri di sexual harrasment frecuentemente na trabou (25.000 hende).
Sra. Bosman manera Bon Dia a trece aña pasa a reuni varios biaha cu e gobiernonan di e dos paisnan. Tambe el a duna presentacionnan. Sinembargo gobierno di Aruba a keda sin actua aunke e tempo ey a haci promesanan (minister e tempo ey, Paul Croes). Na Corsou gobierno a tuma su investigacion si na serio y tuma diferente medida.
Awor su di dos investigacion a cuminsa y sra. Bosman a extende esaki na e sector di enseñansa, esta scolnan secundario y universidadnan di Aruba y Corsou.
Mi no ta bo dushi
Tin un campaña den cuadro di e investigacion nobo yama ‘Mi no ta bo dushi’. AWH ta bisa cu nan a scoge e nomber aki pa un motibo special. Pasobra cada biaha cu nan tabata entrevista sra. Bosman na Aruba y Corsou, el a ricibi comentarionan manera ‘nos tin un cultura di dushi aki’. E ta bisa cu esaki tabata parce un excuus pa comporta den un forma no desea. “E investigacion na 2015/2016, cual tabata un midimento riba nivel zero, ya a mustra cu Aruba tin un problema serio di molester sexual na trabou. Algo cu no por disminui tras di un cultura di dushi”, segun sra. Bosman.
Na maart e lo cuminsa na Aruba cu e promocion di su campaña di investigacion na scolnan y universidad. Nan por participa na un sesion durante 30 minuut cual AWH lo ofrece por nada. Sra. Bosman ta bisa cu e lo tuma contacto tambe cu gobierno y sector priva pa adresa nan responsabilidad di informa nan empleadonan riba maneho y protocol pa preveni sexual harassment y otro formanan di comportacion no desea.
Mas progreso na Corsou
Luna pasa sra. Bosman tabata na Corsou pa coopera cu parlamento riba e iniciativa pa yega na legislacion pa combati molester sexual na trabou . E tambe a organisa diferente sesion na entre otro Banco Central di Corsou y St. Maarten riba e topico. E enfoca ta pa informa e organisacionnan riba e ‘area shinishi’ cu ta existi pa sexual harassment/comportacion no desea. Asina sra. Bosman ta conta. E ta uza un wega pa asina mustra e influencia di limite personal tin riba e area aki y asina crea conscientisacion. E wega tambe ta kibra e taboe cu ainda ta existi, e ta bisa y ta yudando trahadonan pa comunica riba e topico, cual ta un paso importante pa preveni molester sexual.
Manera nos a publica caba, despues di e prome investigacionnan riba e dos isla, e conclusion ta cu mas cu 85% di e populacion laboral no ta sinti nan mes sigur na trabou. Y cu 71% no sa si nan compania/organisacion tin un maneho contra molester. “Nos mester stop di pensa cu esaki ta algo parti di nos cultura”, asina sra. Bosman a remarca e tempo ey.
