Ayera tardi, Juan “Ady” Thijsen a keda eligi como presidente di parlamento. Algo si cu e no kier ta y e kier kibra cu esaki, ta un stempel parlament.

Awor cu su partido MEP ta den gobierno hunto cu un coalicion cu partido POR y RED, e ta haya logico cu como presidente di parlamento e mester mantene ‘e liña cora di nos maneho’. “Pero mi funcion ta tambe pa e cos cana bon. Democracia mester prevalece.”

Ta importante –segun sr. Thijsen- cu e pueblo mester sinti cu tin ‘trias politico’ y cu tin balansa. E no kier pa parlamento ta bira un parti di gobierno, mientras cu gobierno ta haci y deshaci y parlamento ta haci como si nada ta pasando.

E ta fuerte den su posicion pa stempel parlament bira cos di pasado. “Esey ta mi meta tambe. Mi no kier un stempel parlament.”

E no kier bira un presidente di parlamento unda e parlamento cu e ta guia ta un stempel parlament. E ta haya cu apesar cu nan por ta miembro di un partido politico, cualkier cu e por ta, interes general ta prevalece riba interes partidario y personal. “Esey mi ta bay mustra cu poder di Dios”.

Trabou den parlamento
Nos tin un sistema democratico parlamentario caminda nos pueblo ta eligi su representantenan. E ta declara cu cada un di e representantenan aki cu e ta presidi mester haci su trabou. “E ta un trabou hopi importante y hopi serio ya cu nan mester controla e gobierno.

E ta haya cu nos comunidad kier cu nan representantenan ta haci nan trabou manera debe ser. Fundamentalmente controla e gobierno, no ta importa e signatura cu e por ta, ya cu nan ta traha cu placa di pueblo.

Tambe pa e leynan cu ta wordo aproba ta bon ley, y no pa aproba nan pa motibonan politico. Igualmente pa den parlamento nan por tin debatenan sano y riba nivel.

“Un debate cu e comunidad por bisa: Nos ta orguyoso di nos parlamento. E cas di nos pueblo ta funcionando!” E ta spera cu den su funcion nobo e por contribui pa recobra e confiansa aki fei nos pueblo.

Durante e ultimo 8 aña cu fraccion di MEP tabata den oposicion nan a bin cu cuestionamento fuerte riba esunnan cu a yega di fungi como presidente di e organo legislativo aki. Sr. Thijsen tabata un di nan cu a yega di bin cu criticanan durante e delaster añanan. P’esey awor cu e ta sinta den e stoel aki e ta purba di evita di no haci loke e mes a yega di critica.

El a indica cu su partido MEP sa con e ta di caracter. Te hasta tempo cu e tabata lider di fraccion a bin cu puntonan cla durante ultimo gobernacion di MEP, ya cu nan por ta minister di su mesun partido, pero nan tur tin nan responsabilidad. “E minister mester carga su responsabilidad y ami tambe,” el a bisa.

Presidente di parlamento a declara cu no ta cuestion cu interes di partido ta bin prome. “Esey no mag! Mi ta bisa for di awor y nan ta conoce mi. Ami lo evita esey…”

E ta haya cu si e ta haci contrario na loke nan mes a predica riba transparencia, partidario etc., e pueblo lo bay ripara di biaha pasobra tur wowo ta riba parlamento. E ta haya cu un cos ta bisa algo pero mas importante ta cu bo tin cu demostre, ya cu echo ta conta y esey e tin bon cla.

E ta bin cu un ehempel caminda si nan ta yama un reunion y tin documentonan esencial pa nan por tuma decision ariba dje, pero ta resulta cu nan no tin’e nan tin cu buske, ya cu nan mester tuma decisionnan cu tin consecuencia pa nos pais.

“Nos tin cu separa nos mes di e gobierno. Gobierno ta gobierno y parlamento ta parlamento,” el a bisa.