Studiando trabou social specialisa riba cierto gruponan na Hulanda, e hoben Arubiano Nicole ten Have tin planes grandi pa su isla. Den e entrevista aki e ta conta Bon Dia Aruba tocante su experiencia na Hulanda y su plan pa futuro.
Un poco diferente cu otro studiantenan cu ta muda bay Hulanda, e hoben tabata tin experiencia caba cu e pais. E ta conta “Mi a muda pa Hulanda 2 anja pasa pero esaki no tawata mi prome experincia cu Hulanda. Mi tata ta Hulandes y di un edad hopi jong caba nos tawata tuma vakantie na Hulanda. Mi mama y tata a separa ora mi tawata den basis y cu 13 anja mi ruman, mi mama y ami a muda pa Hulanda. Na hulanda pa hopi largo mi a sinti mane mi semper mester “pas me aan” un frase cu mi ta tende hopi kinan. Mi a biba na Hulanda pa 4 anja y ora mi a caba scol na hulanda mi a muda bek na mi isla. Den e 4 anjanan cu mi a biba na Hulanda nunca mi no a stop di hanja falta di mi isla.”
Miedo di bay bek
Aunke e hoben a experencia bida na Hulanda prome cu a bay studia, bay bek no tabata un desicion facil pa tuma. E ta bisa “Bay bek tabata moeilijk pasobra mi tawata tin miedo di sinti e “heimwee” grandi cu mi conoce asina bon, pero mi a bisa mi mes cu ta importante pa studia, i awor cu mi ta “older and wiser” mi lo por handle Hulanda mas bon. Bida na Hulanda nunca no por compara cu mi bida na Aruba. Ora mi tin un dia malo na Aruba, mi por bay lama y lubida tur mi problemanan pa un momento, na Hulanda e unico cos cu mi por hasi ta wak pafo na e shelo shinishi”
Estudio y futuro
E hoben a scoge su estudio pasobra segun su persona e ta haya importante pa percura pa esunnan mas vulnerabel. “Na Hulanda mi ta bezig cu un stage den un bejaardenhuis pa hende cu dementie. Esaki ta un grupo di hende cu bo sa cu no ta bay bira bon mas y pesey ta hopi importante pa ondersteun nan y yuda nan experencia momento bunita. Mi dream ta pa bai bek Aruba ora mi hanja mi diploma y traha den zorg na Aruba. Aruba ta den mi curason y mi kier tey pa mi isla y pa e hendenan den mi comunidad cu mester di extra ayudo. Mi semper ta considera mi mes lucky pasobra mi a experienca Aruba y Hulanda. Mi ta orguyoso di ta Arubiano y feliz cu mi por a crese na Aruba y Hulanda. E combination di e dos pais nan aki a traha mi den e persona cu mi ta awe. Bandi di esey Hulanda tambe a yudami aprecia Aruba pa e isla chikito I bunita cu nos tur ta stima.” ten Have ta finalisa.
