Aunke cu gerente di MFA Noord Richard Tromp a expresa cu ta bayendo bon cu e MFA nan nobo, tin basta keho na januari y februari riba e servicio. Siguramente cu e fluho enorme cu a bin pa paga number di auto.
E kehonan ta varia di e numbernan limita cu e MFA-nan ta parti tur dia pero tambe cu e numbernan no ta klop. Asina na MFA Paradera tabatin bruhacion grandi ora hende a ripara cu esunnan cu a haya number despues di nan a yega na turno mas lihe cu nan. Awor sr. Tromp ta splica cu a cambia e sistema despues a reuni cu SIA, e departamento di impuesto. Nan a dicidi di cambia e sistema automatico di ticket. Antes tabatin diferente opcion di servicio bou di e capa di SIAD, pero awo a pone un solo secuencia di number cu ta sigui otro pa zorg cu no tin confusion di ken a bin prome. “Esey a yuda hopi pasobra ta mas duidelijk pa cada ken cuanto hende tin nan dilanti. Esey a trece pa nos hopi trankilidad den MFA, pero pa e cliente mucho mas claridad y consecuentemente comprension pa con largo e espera ta,” segun sr. Tromp.
Pa dia ta atende entre 125 pa 150 hende, esaki ta hopi mas compara cu antes, e ta bisa, mas ainda teniendo na cuenta cu e capacidad di SIAD na e MFA ta hopi mas chikito cu na Camacuri. “Pero di biaha nos a sinta cu SIA pa puntra nan kico nos por yuda nan cu ne. Nan tabata habri pa hopi sugerencia e ora ey nos a implementa hopi manera pa nos maneha e fluho di hende cu ta bin akinan miho,” asina gerente di MFA Noord ta splica.
Departamento cera
Pa e siman aki cu sede principal di Departamento di Impuesto na Camacuri ta cera pa publico. MFA Noord y Paradera a reuni cu esunnan responsabel di SIA y a palabra cu lo manda dos trahado extra na cada Facilidad Multi-funcional. Tambe lo monitor inmediatamente pa wak si mester di mas hende, nan manda esaki tambe mas lihe cu por. Sr. Tromp a indica cu pa ora SIAD na Camacuri habri bek, ta spera di a baha e cantidad di persona cu tin pagonan pendiente.
