Presidente di HAVA:
Den un edicion anterior, Bon Dia Aruba a trece dilanti e storia di pashentnan cu ta keha ora nan ta warda mas di un ora pa wordo atendi pa dokter nan di cas. Bon Dia Aruba a acerca dokter Van Trigt pa motibo cu e ta presidente di HAVA pa aclara si esaki ta normal of si tin control di esaki.
“Ta depende, normalmente no ta cu pashent tin cu warda un ora of mas largo tur ora. Mey ora ta maximo mi ta haya pa pidi pashent pa por warda. Pero tin caso unda tin emergencia, unda pashent cu a bira hopi malo of dokter tin cu sali di emergencia cerca un pashent”, dr. Van Trigt ta bisa.
Segun dr. Van Trigt, ‘e assistent di dokter mester duna e pashent e informacion, si e pashent ta prefera warda of tin cu bek otro afspraak’. Pa motibo cu e dokter lo por tarda un ora of mas pa bolbe. E no ta algo cu ta pasa frecuente, pero e por sosode de bes en cuando. No ta asina cu tur ora bo bay dokter mester warda asina largo. “Esey no ta normal.”
“E ta wordo splica cu un situacion mas urgente pa motibo di esey e la bin prome. Ta bon semper pa comunica cu pashent. Pa pidi despensa. Sea na dokter o cualkier caminda cu ta duna servicio”, dr. Van Trigt a continua.
“E regla ta semper cu un pashent no mag warda mas cu mey ora den consultorio di dokter, esey ta algo cu HAVA a palabra y bay den acuerdo. Mi ta papiando di HAVA en general. Mi no por papia pa tur miembro, el a wordo aproba pa mayoria di dokter den HAVA. Tin praktijk individual cu lo tin excepcion na e regla.”
“AZV y inspectie mester por bisa si un dokter structuralmente no cumpli cu rekisito cu a wordo palabra por bisa cu mester papia cu dokter y tuma accion.” E control ta na AZV pa haci esaki. AZV diariamente ta haya keho, no kiermen cu tur ora e keho ta valido.
Tin biaha tin mal comprendemento entre pashent of assistent di dokter, of dokter mes, esey no kiermen cu semper tin problema na un cierto praktijk. “Nos sa cu tin cierto praktijk tin problema, e ora AZV tin cu haci su taak ora nan wak cu structuralmente tin un problema.
Pa HAVA e ta dificil paso nos ta un vereniging anto nos ta representa tur dokternan di cas y no ta nos meta pa papia cu colega cu no ta funciona, esey ta un hende externo por beoordeel esey. Si tin señalnan claro por prepara un colega pa un gesprek of un medida ta wordo tuma.
Si tin keho di cierto semper ta bon pa e dokter concerni ta na altura di dje. Tin biaha ta wordo papia di un dokter anto e mes no sa, no ta na altura cu e problema ta asina grandi. E ta bon pa acerca na e dokter personalmente pa puntra cua ta e problema, pa wak con e por wordo soluciona.
Assistent di dokter tambe por yuda pashentnan
Den e kehonan di pashent tambe a bin un keho tocante si e assistent di dokter ta cualifica pa haci cierto cosnan den praktijk dr. Van Trigt a aclara cu Bon Dia esaki.
“Mayoria di pashent no ta custuma cu e sistema unda dokter assistent ta haci preguntanan. Casi tur praktijk di Aruba tin assistent di dokter cu a sigui un estudio anto tin cierto capacidad di por yuda un pashent. Pa haci ‘triage’ pa puntra un pashent cierto pregunta concerni cu e malesa di e pashent. Tambe nan por duna advies.
Tur cos depende di urgencia. E motibo cu nan ta haci esaki ta valido paso nan mester sa cu dolor/ keho e pashent tin. Asina nan por planea agenda. Si un hende tin dolor na pecho, e assistent tin derecho di puntra pa sa si e ta un urgencia. Ban bisa un atake di curason. E assistent ta puntra e pregunta nan necesario.
Un assistent di dokter por duna resultado. Tur resultado ta wordo screen si ta algo urgente e dokter lo yama e pashent pa bin cerca dje. Awo si tur cos a sali bon na resultado e, assistent por duna resultado, claro dokter semper ta responsabel y ta filtra tur e resultado ta controla prome cu wordo duna.
Ta importante pa sa cu assistent di dokter ta capacita, antes dokter so tabata haci. Manera inyeccion, PAP test, check orina, check presion, trato di wratten. E ta bon pa pashent ta na altura di esaki. E no ta dokter pero nan ta e capacidad di haci locual nan por haci. Pero semper dokter ta keda responsabel.
Pashentnan tin miedo tambe di conta nan assistent di dokter paso nan ta cosnan personal. Pero pashent mester ta na altura cu cada consultorio tin ‘beroepsgeheim’. Tur cos cu bo conta e assistent di dokter ta keda den consultorio. “Si mester sa algo a sali pafo di consultorio e assistent lo haya un boet pisa”, sr. Van Trigt a finalisa.
