Den 24 ora, entre diadomingo marduga y dialuna marduga, violencia den estado Guerrero, den sur di e pais, a cobra bida di 16 persona asesina, ademas di seis vehiculo kima, segun informacion di e fiscalia local.
E hecho mas reciente a keda registra dialuna marduga durante celebracion di un fiesta di 15 aña den un restaurant na Chilpancingo, capital di e estado. Na e luga a muri un menor di 17 aña y posteriormente a fayece na un hospital un homber di 43 aña cu a keda herida durante e atake.
Otro cuatro persona herida, entre 16 y 23 aña, entre nan un muhe, a ser transporta pa e hospital general di Chilpancingo. Otro crimennan a sucede na dos luga turistico di e estado, Zihuatanejo y Acapulco, den cual dos hende homber a ser asesina.
Un dia prome, diadomingo, a sucede 13 homicidio reparti entre varios municipio y cinco vehiculo a keda kima na Acapulco.
Na nivel nacional, 2017 a registra un total di 23.101 homicidio entre januari y november, segun Secretariado Ehecutivo di e Sistema Nacional di Siguridad Publico. Cu e cifranan aki, 2017 a keda confirma como e aña mas violento na Mexico den ultimo dos decada, superando e 22,409 asesinatonan di 2011. Na 2018, e prome luna di aña a converti den e januari mas violento cu e pais a yega di registra, cu mas di 2.500 persona asesina, mas di 80 pa dia. E zonanan cu a suma mas homicidio den e lapso di tempo ey tabata Baja California, cu 211, y Guerrero, cu 204. Den estado Guerrero na 2017 a registra mas di 2.000 homicidio, na rason di 6 pa dia.
Mexico tin casi 11 aña den un lucha contra droga y desde e tempo ey violencia no a para. Di acuerdo cu datonan di fiscalia, na Guerrero ta existi diferente cartel den disputa pa e teritorio, entre nan tin e ‘Familia Michoacana’, e cartel di ‘los Beltran Leyva’ y e cartel ‘Jalisco Nueva Generacion’.
