E reporteronan Miroslava Breach, Ricardo Monlui y Cecilio Pineda a muri a traves di tiro den luna di maart. Tur tres tabata investiga caso encuanto politico y nan probabel relacion cu crimen. Univision por a comproba esaki, cu ayudo di nan coleganan. Esaki ta e ultimo casonan riba cual nan tabata traha.

Tera pa amapola
Prome cu el a keda asesina, e periodista Mexicano Miroslava Breach, di 54 aña, tabata investiga varios historia relaciona cu narcotrafico y politica den estado Chihuahua. ‘Miros’ manera tabata su number di cariño- a keda asesina riba mainta di dia 23 di maart ultimo. Un colega, cu a prefera di keda anonimo, a bisa Univision Noticias cu periodismo tabata lo cual mas tabata apasiona Breach. Su compañero di trabao ta kere cu el a muri “ pa no keda keto, pa no tin miedo.” E corant nacional La Jornada a publica cu Miroslava, cu tabata su coresponsal na Chihuahua, tabata menasa despues cu el a revela cu miembronan di crimen organisa tabata sacando indigena di nan tera den e estado aki. E terenonan ocupa nan tabata uza pa cultivo di amapola, cu ta duna e base pa produccion di heroina.

E sector di sucu y politica
E reportero Ricardo Monlui Cabrera tabatin 57 aña y tres decada di trayectorio periodistico, cu a yega un fin ora un grupo arma a tire di cerca dia 19 di maart na salida di un restaurant na municipio di Yanga, Veracruz. Entre su ultimo columnanan publica den El Politico de Xalapa, Monlui a informa tocante e conflictonan interno di Partido Revolucionario Institucional (PRI) y di su aspirantenan pa bira alcalde di Veracruz, criticando nan pasobra nan no a duna cuenta di unda nan recursonan tabata bin.

Coleganan di Monlui Cabrera a comenta na Univision Noticias cu e periodista principalmente tabata skirbi tocante e sector cañero y cu den e ultimo simannan e tabata sigui e benta di ingenionan di sucu y ademas e conflictonan dentro di e sindicatonan. Tambe tocante e relacion entre empresario di e sector y politica, di personanan manera Fidel Herrera y Javier Duarte, persigui pa crimen organisa, desviacion di recurso y labamento di placa. ‘Los Tequileros’ di Tierra Caliente.

E periodista Cecilio Pineda a ser asesina na Tierra Caliente, Guerrero, unda diferente grupo arma ta mantene un lucha fuerte pa control di e teritorio. Un grupo di homber arma riba motociclista a tira riba Pineda dia 2 di maart di e luna aki, ora e tabata warda riba su auto pafo di un carwash automatico. Algun ora prome cu e aten- tado, Pineda a denuncia un supuesto pacto entre funcionario di gobierno di Guerrero, incluyendo e gobernador Héctor Astudillo Flores, y miembro di e cel di ‘Los Tequileros’, cu ta pertenece na e ‘Familia Michoacana’. Den un video live riba su cuenta di Facebook, Pineda a conta cu pobladornan di e zona a arma nan mes y a documenta cu ‘Policía Preventiva Estatal’ (PPE) cu ta custodia Tierra Caliente, presuntamente ta brinda proteccion na ‘Los Tequileros’ y nan lider Raybel Jacobo de Almonte.